可以share嘅車仔麵 灣仔四爺車仔麵專門店

車仔麵呢樣嘢,我相信大家一定有食過,一碗熱辣辣嘅車仔麵,碗上面放滿3至4樣自己鍾意食嘅配料。而每次落單前,我都會同M佬夾好,你叫呢幾樣,我就叫嗰幾樣,務求食得最多款!但如果同朋友食,唔通食食吓先叉隻筷子去人哋嗰度咩?而呢間位於灣仔嘅四爺車仔麵專門店,就將麵同餸分開上,除咗方便大家share,我覺得更重要係每款配料都有唔同嘅味道,於埋一齊可能會怪怪的哦。

食車仔麵最重要就係個醬汁,呢度就有麻辣、咖哩同腩汁;而湯底絕不含味精,仲可以揀金牌豬骨老火湯、傳統牛骨湯底、青紅蘿蔔雪耳湯或者車仔撈麵喇。而配料方面,分為唔同左系列,好似有瑞士汁系列、古法滷水系列、麻辣系列、柱侯系列、咖喱系列、港式系列等,有超過40款選擇。

青紅蘿蔔雪耳湯菠菜麵(瑞士汁珍珠冬菇、咖喱陳皮魚蛋、咖喱魷魚、清甜蘿蔔)
用上青紅蘿蔔、蜜棗、老陳皮、龍牙杏、雞肉同豬展等材料,煲6小時而成嘅青紅蘿蔔雪耳湯,無味精,夠晒清甜滋潤,真係好有家嘅感覺。而為咗怕配料影響湯嘅原味,所以麵同餸分開上。少有車仔麵檔會提供菠菜麵選擇,淡淡嘅菠菜麵好有新鮮。而瑞士汁珍珠冬菇炆得軟腍入味;而咖喱陳皮魚蛋同咖喱魷魚,夠彈牙,而且咖喱味超香濃;最好味係清甜蘿蔔,好鮮甜又無渣。

最後,我可以飲晒呢碗老火湯,如果可以添飲就好喇。

傳統牛骨咖喱汁湯底米線(瑞士汁豬仔腩、咖喱牛栢葉、麻辣牛肚、柱候牛筋腩)
M佬就傳統啲,叫咗傳統牛骨湯底。呢個牛骨湯底用超過80斤牛骨、新鮮蔬果同秘製香料熬製而成,味道濃郁,仲好有層次!米線唔會碎濕濕,軟硬度適中。而瑞士汁豬仔腩,軟腍又入味,重點係唔會好肥;索晒咖喱汁嘅牛栢葉,真係好惹味!柱候牛筋腩份量夠晒多;至於麻辣牛肚就略嫌香料味過重。

皇牌瑞士汁雞翼
必定要叫!本身諗住跟麵叫,但原來散叫會抵啲。呢個雞翼肉夠厚實,又入味!超好味!

枱上面仲有秘製辣椒油同酸蘿蔔㗎!

四爺車仔麵專門店
地址:灣仔莊士敦道25-33號長康大廈地舖
電話:+852 2877 2668
營業時間:星期一至日 11:00 – 20:00

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *