台式養生車仔麵 銅鑼灣養心麵

A姐就嚟生日,所以佢話要shopping買禮物俾自己,我就要幫佢拎住一大袋嘢。行到下奏3點,終於可以食lunch喇,但佢話求其食碗快麵就繼續博殺,快麵我可以接受,但求其真係唔得。一於去食碗車仔麵啦,去到呢間位於銅鑼灣嘅養心麵,係養心殿台式養生鍋旗下品牌,主打台式養生車仔麵,講真真係第一次試台式車仔麵呀。

話明台式車仔麵,梗係有台灣特色啦。例如麵底除咗一般嘅幼麵、粗麵同油麵等,仲有由台灣直送嘅台灣關廟麵、台式寬粉條同新竹米粉。而配料除咗一般嘅港式豬皮、蘿蔔同魚蛋,當然唔少得台式配料啦,好似有滷水大腸、肉燥,仲有台灣直送嘅香菇貢丸、A菜、炸豆皮等。

食車仔麵最重要就係個醬汁,呢度就有麻辣或咖哩;而湯底就可以揀美人湯或者麻辣湯喇。

咖喱美人湯新竹米粉(台式滷水金錢肚、香辣豬皮、安格斯牛腩)
A姐呢個大美人就揀咗美人湯,所謂美人湯,其實就係養心殿台式養生鍋最出名嘅火鍋湯底,依家就帶到嚟養心麵。呢個美人湯係品牌首創,用烏雞、桃膠、杞子、南棗同金華火腿等熬製,含有豐富膠原蛋白,夠晒滋補!想養顏就要揀美人湯喇!而新竹米粉超幼身爽口、金錢肚索晒滷水汁、豬皮唔算太辣無渣;另外,安格斯牛腩嘅牛味特別香濃。

麻辣台灣關廟麵(台式麻辣鴨血、辣汁魷魚鬚、辣味牛筋)
以台式豆瓣醬、指天椒、辣椒葉油、白豆蔻同草果等13種香料煮成嘅麻辣湯,香味濃郁,唔算太辣。而叫得麻辣湯,又點少得鴨血呢?鴨血份量超多,又夠滑嫩、而魷魚鬚就新鮮爽口、相反,牛筋就軟腍。咁嘅配搭,就係好有口感。

最後,建議配埋枱上嘅自家辣菜甫同辣椒油一齊食。

養心麵
地址:銅鑼灣軒尼詩道365號地舖
電話:+852 2525 5950
營業時間:星期一至日 11:00 – 03:00

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *