大食王M佬與肉食王A姐嘆高質任食韓燒放題 佐敦平昌Premium

IQ題:邊度最啱大食王M佬同肉食王A姐開餐呢?當然就係任食放題啦!

但放題嘅質素真係好參差,要求高高嘅A姐又點會求求其其搵間就算,左搵右搵,呢間屬於BBQ7080旗下嘅平昌Premium應該唔錯。話晒叫Premium應該係高級野(係呀!我A姐就係咁膚淺,如果間餐廳叫超好味就一定係超好味啦,如果唔係,我實鬧佢㗎)!

所以今日就去到佐敦平昌Premium食韓燒放題,咁就啱晒大食王M佬同食肉獸A姐啦!

坐低先送上5款泡菜同1碗沙律,開吓胃先。

晚餐燒烤,肉類選擇有18款、海鮮類6款、蔬菜類4款,仲有13種韓式料理。如果想再Premium啲,仲有6款Top up嘅食材。好喇,胃部開動啦!저기요(係呀,呢度又係一個好多韓國人工作嘅地方)!

肉類:第一round就當然係肉、肉同肉啦!牛肋骨肉好香肉味,夠晒juicy。不過,唔好好似我哋咁,掛住影相就燒耐咗,咁就會好硬喇。牛脷厚切好有咬口,而我哋最愛嘅就係調味豬肉,因為真係醃得好入味呀。當然唔少得我最愛嘅雞翼啦,不過,各位Fans,有無方法教我哋燒雞翼呢?因為真係有啲難燒得熟呀!

海鮮類:一次過叫生蠔、魷魚、帆立貝、蝦同鰻魚,真係食多兩轉都夠回本啦!生蠔同帆立貝都好新鮮,大大隻,點埋醬汁真係好鮮甜。蝦雖然係冰鮮,但係食落去都好有蝦味;而烤魷魚就最麻煩,因為真係好痴鑊,雖然好食,但烤魷魚就換咗2次鑊。鰻魚只要輕輕烤熱,加埋鰻魚汁,正呀!

烤鮑魚:Extra叫嘅鮑魚,一碟4隻,半隻手掌咁大,加埋芝士一齊燒。鮑魚好新鮮好腍身!$98有4隻鮑魚,抵呀!

烤大蝦:夾住牛油嘅4隻大蝦上枱,成隻手掌咁大!蝦身好彈牙好鮮味呀!

海鮮豆腐辣湯:最後,叫多咗個海鮮豆腐辣湯,韓式石鍋上枱,夠晒熱辣辣之餘,湯味又香又濃又辣,配料仲有蜆㗎!

除咗以上嘅推薦,仲有烤梅頭肉、烤LA牛排骨都唔錯㗎!下次想食韓燒,我會再拉M佬嚟Encore!

平昌 Premium (Pyeong Chang Premium)
地址:佐敦彌敦道219號莊士倫敦廣場5樓
營業時間:星期一至日: 12:00 – 00:00
電話:+852 5901 7080

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *