尋回港式美味 葵芳文華冰廳

今日A姐話想去葵芳買嘢,我諗我只係負責幫佢拎嘢架啦,所以我先去新都會廣場食住等佢,見到大排長龍嘅原來係文華冰廳!其實冰室都係香港嘅本土傳統文化,仲記唔記得細過去冰廳食西多士、菠蘿包、蛋撻同紅豆冰呢?諗起都想食!而A姐真係計啱時間,一排到我,佢就拎住一袋二袋嚟到,同我一齊三點三。

黯然銷魂飯
黯然銷魂飯其實就係叉燒煎蛋飯,好似一個好簡單嘅菜式,但其實都好有考究,好似啲叉燒有燶邊、肥瘦適中,仲要係厚切,食落仲有陣陣嘅蜜糖香!最正係有兩隻燶邊荷包蛋,吉穿佢,裡面嘅蛋黃即刻熔出黎,配合埋微甜嘅豉油汁,真係好match!細心位係飯用上金鳳香米,真係好有飯香。

煉奶西多
即叫即炸嘅西多士,真係夠晒熱辣香脆!用煉奶取代花生餡同糖漿,估唔到又幾好味!而西多士被上下嘅蛋漿厚厚包住,好滿足呀!

鮮牛油菠蘿包
記住要留意餐廳嘅出爐廣播,如果慢咗或者miss咗,又要等下一轉喇!菠蘿包係自家製,睇準佢出爐時間,咁先食到最新鮮熱辣,脹卜卜嘅菠蘿包,外脆肉軟,加上勁滑牛油,必食推介!

紅豆冰
紅豆冰係嚟冰室必飲嘅冰品!紅豆好大粒好飽滿,食落好有口感!

新鮮出爐酥皮蛋撻
酥皮蛋撻係另一推介,同樣要留意餐廳嘅出爐廣播,上到枱出晒煙,拎上手熱辣辣,蛋除咗夠香,仲好夠滑!而酥皮底好香脆!

滾水雞蛋
依家好少地方有滾水雞蛋,難得見到就當然要試啦,採用日本雞蛋,夠晒信心保證!蛋味好香呀!

文華冰廳 Man Wah Cafe
地址:分店資料

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *