對A姐好啲 去中環FUMI食懷石料理

上兩個星期,A姐因為趕住準備公司Event,日日都要OT,好大壓力,無啖好食。作為廿四孝男友,就梗係要慰勞下我嗰豬豬啦!今日帶A姐去中環蘭桂坊California Tower 6樓嘅FUMI食懷石料理。懷石料理講求精緻,無論餐具定係擺盤嘅要求都好高!我哋叫咗立夏の懷石套餐,加埋$280 清酒pairing,不醉無歸!

餐前酒:獺祭50純米大吟釀
一開始就嚟杯冰凍嘅有氣Sake獺祭50純米大吟釀,用咗獺祭三割九分,再喺瓶內進行二次發酵,口感豐盈,氣泡特别爽口,仲有淡淡嘅果香,容易入口,非常清新!

前菜:蝦夷鮑魚花竹蝦 + 大門 x 文純米吟釀
賣相簡潔清新,有蝦夷鮑魚、花竹蝦、青瓜同迷你蕃茄,非常足料!花竹蝦爽口彈牙,蝦夷鮑魚鮮甜可口,加埋青瓜、迷你蕃茄同青檸片,清新開胃!配埋入口清甜嘅大門 x 文純米吟釀,真係無得彈!

刺身:呑拿魚腩、沙甸魚、牛鰍薄切刺身、金目鯛刺身
刺身擺盤吸引,刺身濕潤新鮮。呑拿魚腩油花豐富,魚油味十足,入口即溶! 金目鯛被輕輕炙過,淡淡嘅焦味,食落更香口,肉質結實彈牙。沙甸魚魚味濃郁,加埋香葱同薑蓉,鮮味肥美!牛鰍薄切,口感紮實,點埋刺身醋,更加清新。

煮物:高知四萬十川鰻魚配豆腐湯
大廚用上來自四國高知縣四萬十川市嘅鰻魚,被稱為「日本最後的清流」,魚肉厚身,鮮味十足,配合嫩滑嘅豆腐同淡淡嘅熱湯,更見魚鮮!

燒物:西京麵豉漬燒鯧魚 + 伯楽星純米吟釀
麵豉漬鯧魚肉質結實,麵豉味濃,配合微酸嘅伯楽星純米吟釀,中和燒鯧魚嘅咸度,配搭得宜!

天婦羅:目光魚、太刀魚、粟米、京都青椒、同宮崎甜蕃薯 + 男山特別純米(北海道限定)
天婦羅炸粉唔多,又好乾身,係出色嘅天婦羅!目光魚魚味較濃,太刀魚啖啖肉、粟米清甜煙靭,京都青椒鮮味十足。我最愛宮崎甜蕃薯,清甜無根!加埋岩鹽,食材鮮味更為為凸出!再配爽身嘅北海道限定男山特別純米,好似我同A姐咁合拍!

主菜:慢火烤宮崎牛西冷(凍)
識食梗係食宮崎牛,慢火烤過,外表微微熟,裏面仲係保持紅色。油脂分佈平均,肉質嫩滑,入口即溶,點埋岩鹽,鮮味十足,真係好味到唔想講嘢,只係想細心品嚐!

飯:香蔥呑拿魚腩茶漬飯
大廚採用由越光米改良而成嘅山形縣黒澤農園白雪女皇米嚟煮,
口感煙韌,米香味重,加埋香蔥呑拿魚腩同Wasabi,味道配合得啱啱好!

水果:日本時令水果 + 白桃妃
最後,食埋蜜瓜、哈蜜瓜、巨蜂提子同香印提子,再埋岡山縣嘅白桃妃,真係好滿足!

FUMI
地址:中環德己立街30-32號加州大廈6樓
營業時間:星期一至六 11:30 – 15:00;18:00 – 23:00
電話:+852 2328 3302

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *