尖沙咀尖東原の味Naked 食埋外表嘅西日Fusion菜

今日M佬同我睇完Art Central之後,成個人都好似藝術家上身咁,我發覺我真係好有氣質囉!所以今日嚟到尖沙咀尖東原の味Naked,點都要食番餐又睇得又食得嘅晚餐,感受一次每一道佳餚都可以係一件藝術品!

蓮藕脆片


作為前菜唔油膩仲帶點焦燶味。藕片仲有少少砂糖,食嘅時候,記住點埋松露沙津醬呀,細心感受吓,呢個醬混入咗少少wasabi同松露,實在係好高嘅層次。可唔可以要多碟呀?

帆立貝冰菜沙律


帆立貝一向都係我的最愛,切到薄身,新鮮之餘仲好juicy,上面鋪上沙律菜,好靚呀!旁邊仲有冰菜,配上炸煙肉碎、豆腐同芝士,再加埋芝麻醬嘅麻香,好開胃呀!

薰衣草枝豆


驟眼睇,以為係無乜特別嘅枝豆,但原來粒粒都充滿薰衣草嘅香味,真係越食越放鬆,M佬,我會唔會瞓著㗎?

魚子醬迷你脆筒二重奏


賣相好cute呀!聽店員講,大廚用咗加拿大海膽同新鮮吞拿魚,再加魚子醬製成嘅脆筒,淨係聽都覺得係為咗我呢啲咁高貴嘅女士而設啦!海膽夠晒海水味,仲好清甜呀;而吞拿魚就夠晒綿,仲帶有七味粉嘅微辣。不過,魚子醬份量唔多,但都感受到魚子醬嘅鮮甜。

押壽司卷物拼盤(芒果醬三文魚押壽司、紅葉頭汁牛油果蟹肉卷、赤蝦押壽司、黑松露劍魚腩押壽司)


四款唔同嘅壽司各有特色,不過,每款都係得一件,M佬又點夠食喎。

芒果醬三文魚押壽司:火炙三文魚配上芒果醬,令一向唔鍾意水果入饌嘅A姐都愛上,估唔到芒果醬同三文魚都可以咁夾。

紅菜頭汁牛油果蟹肉卷:粒粒飯都占上紅菜頭汁,成個卷物都係紅色,好靚呀!而卷物入面有蟹籽、蟹肉同牛油果,好味得嚟又夠健康。

赤蝦押壽司:蝦肉好彈牙,好新鮮,一向鍾意食蝦嘅我,忍唔住想偷偷食埋M佬嗰舊。

黑松露劍魚腩押壽司:咁多隻魚生之中,劍魚腩絕對喺我心目中有好高嘅地位,再加埋黑松露,真係好矜貴呀。

吞拿魚腩配48個月伊比利亞火腿卷

最底層係48個月伊比利亞火腿,中間就係超肥美嘅拖羅,頂層仲有配上藜麥嘅拖羅蓉,旁邊仲有海葡萄,真係望見都唔捨得食呀。火腿嘅煙薰味好濃好香,而拖羅入口即熔,好味到,我真係唔識寫落去喇!

黑松露忌廉湯

忌廉湯加入黑松露都算係近年嘅must,當然有啲餐廳嘅黑松露就用上雲南出品,味道較淡。而呢度嘅黑松露忌廉湯,除咗好夠松露味,湯仲夠晒滑,唔錯。

日式辣酒煮花螺

大排檔食辣酒煮花螺就食得多,日式嘅就類似關東煮,入面有好入味嘅蘿蔔同獅子狗魚蛋,重點之重當然係花螺啦,好入味又無沙,夠晒創新。

原の味 Naked
地址:尖沙咀麼地道61號冠華中心地下G1號舖
營業時間:星期一至六: 11:30-14:30; 18:30-23:30
電話:+852 2363 7299

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *