屋邨地道韓食 長沙灣新派韓食館Sister Korea Cafe

今日同A姐去元州邨探朋友嘅BB,離開嘅時候經過元州商場搵飯食。不過,屋邨商場通常都離不開各大連鎖快餐廳,直到A姐見到韓國餐廳,又報以一個好想食嘅眼神,我又點會唔融化呢?所以我幾時都話A姐鍾意食韓國菜㗎啦!入到去,望吓個menu,咁熟口面嘅!原來呢間餐廳,我哋上次喺大圍都食過㗎!

同大圍分店一樣,選址平民嘅屋邨商場,但店面佈置同食物質素一啲都唔馬虎,懷舊韓風格調,配以韓國音樂同韓國員工,其實都幾有feel!

餐廳提供四款泡菜,包括:大白菜泡菜、辣蘿蔔絲、芽菜同菠菜,作為前菜嘅份量不多,但就夠晒醒胃。

泡菜蠔仔煎餅

除咗台式蠔仔煎同潮式蠔餅,原來韓式嘅蠔仔餅都唔錯喎!好多人話蠔仔點都好似腥腥哋,所以就會加入胡椒粉僻腥,但韓式就用上微辣嘅泡菜,意外哋帶出蠔仔嘅鮮甜。蠔仔粉量雖然唔多,但粒粒都好肥美㗎!

清河醉雞翼

韓版醉雞用上韓國酒嚟醃,每隻雞翼都漲卜卜,好大隻,仲有淡淡酒嘅清香,好入味,作為前菜好開胃。

火焰芝士拉豬仔骨

餸菜上枱後,韓國店員就好細心咁幫我哋預備。首先,店員先用慢火整融啲芝士,再將芝士捲起包住豬仔骨,捲好咗就要趁熱食喇!豬仔骨好入味,配埋濃郁嘅芝士,好惹味呀!鐵板側邊仲有爐邊蛋、粟米同芽菜,不過,栗米就略嫌太油。

醬醃莞島鮑魚

上次食過醬油蟹,今次就試吓鮑魚啦!蒸熟嘅鮑魚,配以20多款配料同醬油醃製而成,雖然呢20款配料唔知有乜,但醃得都幾入味,上枱仲已經幫你切好片,鮑魚唔韌,仲好爽口彈牙添!

Sister Korea Cafe 新派韓食館
地址:長沙灣元州街303號元州商場地下G16號舖
營業時間:星期一至日: 11:30-22:30
電話:+852 2596 0268

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *