層層海鮮塔 紅磡九重鮮

我哋啱啱去完澳洲,食咗無數隻生蠔、海蝦同魚,可能食海鮮食上癮,返嚟香港又好想食海鮮!其實要食海鮮嘅鮮味,蒸,海鮮真係冇走雞。我哋就去咗紅磡黃埔九重鮮,試下佢嗰升級版濟州島10重海鮮塔。

除咗海鮮塔同泡菜煎餅外,仲有仼食自助吧,有前菜、沙律、泡菜、年糕、韓式小食同特式甜品。每人加$12仲可以upgrade任飲韓國啤酒汽水同自家制凍飲,包括:竹蔗茅根同袪濕薏米水!

自助吧
自助吧食物款式豐富,前菜有有多款韓式泡菜,包括:大豆芽菜、苦瓜、泡菜等。仲有沙律吧,啱晒懶健康嘅A姐!

最正係有韓式炒年糕,辣味啱啱好,超級惹味!仲有韓式魚糕湯,嗰湯煮得好入味,一串串魚糕任食,真係好似去咗韓國咁!

另外,自助吧會定時推出限定菜式,有炸雞、醬油鮑魚、醬油蝦等,聽到鼓聲就,記住出去攞啦!

泡菜煎餅
每台仲會送上泡菜煎餅,記住趁熱食,鍾意佢呢度嘅煎餅比較薄,邊位仲有少少脆,口感一流,配埋泡菜真係好惹味!

升級版濟州島10重海鮮塔
今晚嘅主角終於到啦!升級版濟州島10重海鮮塔上面有個溫度計,當佢去到95度,店員就會幫你開蓋,每層每層咁食!全部海鮮都非常新鮮,蒸岀原本鮮味,原汁原味!

第一層:黑椒鹽肥牛 + 象拔蚌 + 海蝦
一打開就見到黑椒鹽肥牛,象拔蚌同海蝦,排得靚靚。象拔蚌預先切好,食得好方便,清甜爽口;海蝦新鮮彈牙,鮮味十足;黑椒鹽肥牛,有淡淡嘅黑椒味,吊出肥牛嘅鮮味,非常惹味。

第二層:日本元貝
日本元貝超級大隻,肉質結實,鮮甜味美,上面鋪滿粉絲同蒜蓉,吸晒啲鮮味,真係食到心心眼都出埋嚟!

第三層:龍蝦
嘩!好大隻龍蝦呀,蒸都紅卜卜,好吸睛。龍蝦肉入口彈牙,非常飽滿,鮮味十足。龍蝦鉗啖啖肉,最正仲係有好多膏,真係好滿足!

第四層:龍躉指天翅 + 大花蛤 + 沙白
兩大塊龍躉指天翅,肉質嫩滑,魚油味豐富,好多骨膠原。大花蛤同沙白新鮮無沙,鮮甜多汁。

第五層:鮑魚 + 蔬菜拼盤
兩大隻鮑魚放喺中間,厚肉彈牙,食到鮑魚嘅原汁原味。外面就圍住新鮮蔬菜,最正係嗰粟米,真係超甜。

最後去自助區食埋甜品同生果,真係好滿足!

九重鮮
地址:紅磡黃埔天地聚寶坊(第11期)地下G26號舖
營業時間:星期一至五 12:00-15:00、18:00-23:00;星期六至日 12:00-15:00、17:30-23:00;公眾假期 12:00-14:45、17:30-23:00
電話:+852 2321 0188

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
報料或合作:keepintouch@aandmdiary.com

Leave a Reply

Your email address will not be published. Required fields are marked *