推介給遊客的你 銅鑼灣龍門冰室

好多外國或國內嘅朋友都問我哋,嚟到香港有無咩推介?被譽為美食天堂嘅香港,港式點心、菠蘿油、蛋撻等等都好有特色,至於想食茶檔或冰室嘅,今日我哋就嚟到銅鑼灣登龍街永光中心嘅龍門冰室,唔知又值唔值得推介俾遊客呢?

蜜糖雞翼
雞翼一客有6隻,上枱見到佢燒到黑黑咁,賣相就唔多好喇,好彩外皮都算脆,而蜜糖係成個雞翼加分之處,甜甜哋都算惹味。

黑松露芝士焗雜菌西蘭花
西蘭花上有好多芝士同白汁,仲有好多雜菌,如果呢個餸叫黑松露芝士焗雜菌,我會俾滿分佢,因為啲雜菌索晒黑松露同芝士,濃香味滿分,但西蘭花完全係無味,連少少鹹味都無,餐廳或者應該考慮改名做白灼西蘭花。

咸牛肉玉子燒配炸帶子意粉
玉子燒入面有好多咸牛肉,不過玉子燒得太耐,燒到死實實,做唔到軟滑流心之感;而炸帶子就好乾,更恐怖係個意粉,又硬又乾,成碟嘢都乾爭爭,真係要不停飲水先得呀。

咸牛肉玉子叉燒飯
同樣嘅玉子燒入面有好多咸牛肉,不過玉子燒得太耐,燒到死實實,做唔到軟滑流心之感;叉燒份量唔少,但係又硬又乾,正面啲去睇,就係叉燒夠瘦,不過,成碟嘢都係又硬又乾。

沙嗲牛肉麵配多士玉子燒
成餐飯入面最正就係呢個沙嗲牛肉麵,沙嗲牛肉嘅份量超多,而麵底當然係好難輸嘅,真係好味!預咗玉子燒都做唔到軟滑流心之感喇,不過,多士可以轉煉奶,烘到脆卜卜,加晒分。

龍門冰室 Lung Mun Cafe
地址:銅鑼灣登龍街28號永光中心地舖
營業時間:星期一至日 07:00 – 01:00
電話:+852 2413 4168

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
報料或合作:keepintouch@aandmdiary.com

Leave a Reply

Your email address will not be published. Required fields are marked *