旺角樓上西餐廳吃吧Chiba 意外驚喜嘆慢煮牛柳

唔知大家鍾唔鍾意玩密室呢?我家M佬就係一個密室迷,佢話能夠帶住心愛嘅人離開密室係一件好man嘅事,但我心諗,首先係你帶我入密室先㗎!之但係,每次玩完密室,喺旺角搵嘢食就係一大難題。大家都知啦,我A姐最怕就係人多車多,左邊又有人食煙,右邊又有人拎住滴緊汁嘅魚蛋,真係好Scary!不過,今日M佬早有準備,佢特登搵咗間舒舒服服嘅上樓西餐 — 吃吧Chiba,帶我去Chill Out喎!

吃吧Chiba位於旺角嘅樓上餐廳,門口已經有隻大匙羹同叉,入到去仲有好多手工啤酒嘅擺設,而且餐廳嘅裝修時尚,燈光又唔會太暗,坐得都算舒服,第一感覺都唔錯呀!

香炸海鮮拼盤

頭盤先嚟個香炸海鮮拼盤,有蝦、蟹拑、蟹餅同蠔,真係啱晒佐酒!炸粉好薄,加上係即叫即炸,所以好鬆脆!驚喜在於各海鮮無雪味,如果怕熱氣,可以加埋旁邊嘅沙律醬同沙律菜一齊食,罪惡感大大減低!

蘋果木煙薰西班牙豬扒

上枱時慢慢拎起個蓋,等煙慢慢散開,都幾有feel㗎!呢道菜嘅頂層係蘋果粒,底層就係西班牙豬扒,仲有唔同嘅配菜,包括:車厘茄、蘆荀、薯仔蓉及紅菜頭蓉,淨係嗰賣相都贏晒!經過煙薰嘅西班牙豬扒,好豐富嘅蘋果香呀,而西班牙豬扒煮到八成熟再用蘋果木煙薰,肉質鮮嫩多汁,好好味呀!

慢煮牛柳

用平均75攝氏度慢煮而成,牛柳中心呈現嫩紅色,生熟程度啱啱好,牛肉唔會太老太嚡口,肉質完全不韌,好鮮嫩,好Juicy㗎!

Kwak

酒味濃郁,仲有淡淡嘅甘草糖香同焦糖嘅香味,苦甘後就會有好香甜嘅味道。M佬話好鍾意喇!

芒果沙冰

天氣開始熱,我A姐就決定飲啲熱帶果味嘅沙冰涼透心!芒果味好香濃,解渴一流!

吃吧 Chiba
地址:旺角彌敦道566-568號僑建大廈2樓2室
營業時間:星期一至日: 15:00-00:00;星期二: 休息
電話:+852 6127 7112

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *