款式種類夠晒多 銅鑼灣滿屋日本料理

A姐:我依家真係肚餓到……食得落一隻牛呀!

有無咁誇呀?以佢嘅食量一條魚就差唔多。不過,既然你咁肚餓,咁就一於去食放題啦!呢間位於銅鑼灣廣場二期嘅滿屋日本料理唔知又啱唔啱A姐心意呢?

一入場已經見到成枱野食,除咗餐前小食(螺肉、帶子裙邊、味付素翅、泡菜等),仲有凍海鮮(蜆、青口、蝦)、沙律吧、熱盤(日式豬手、口水雞、避風塘蝦等)……好多好多呀!

而最吸引我哋嘅係個茶樹菇燉湯,真係好足料,飲落又唔係味精味!少飲湯水嘅我哋,結果就一人一盅啦。

枱面有兩大本menu,入面有超過100樣嘅食物同飲品,食放題識食一定係食刺身啦!刺身類有9個選擇,除咗三文魚、甜蝦同希靈魚,連放題比較少見嘅油甘魚、赤貝都有!最驚喜嘅係呢度連中吞拿魚腩都有呀!全部都夠晒新鮮(呢個應該係基本要求),仲要係厚切!!!真係好好味呀!

至於放題,一向少食壽司,不過,呢度嘅壽司選擇都好吸引,有火灸原條穴子壽司,原來關東人鍾意食河鰻,而關西人就鍾意食海鰻,而海鰻就即係穴子又即係星鰻,所以點都要叫嚟試試。穴子嘅肉質細嫩淡雅,正。

另外,日式熱食有焗廣島蠔、汁燒石斑魚、鹽燒雞翼、鹽燒牛舌都唔錯呀。

臨尾都要食個雪花牛肉鍋。

 

至於呢度嘅飲品,除咗一般可樂汽水、啤酒,仲有少見嘅波子汽水同解茶,唔止呀,仲有清酒同梅酒都係任飲!如果都唔啱你心水,可以叫呢度嘅特調:紫貝天癸白桃梳打或藍糖白桃梳打!

而甜品方面都有好多選擇,最吸精一定係開心果噴泉、綿花糖同爆谷啦!而最揼本嘅係,一人一杯Movenpick / Haagen Dazs做甜品添!

呢間放題漏單情況唔嚴重,我哋叫咗10幾轉,只係漏咗天婦羅,不過,我哋食到飽飽,所以都無追單喇。

滿屋日本料理
地址:銅鑼灣駱克道463-483號銅鑼灣廣場二期8樓
營業時間:12:30-15:00;18:00-23:30
電話:+852 3622 3366

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *