漢城如今改稱首爾 銅鑼灣首爾家韓國料理Seoul House

其實我A姐一直都好鍾意以前叫漢城嘅首爾㗎,因為呢個名真係好似好有詩意,如果今時今日仲係叫漢城,唔知呢間舖頭會唔會叫首爾家韓國料理Seoul House呢?!哈哈!

有留意開我哋嘅都知,我哋最鍾意食嘅一定係打邊爐,而我最鍾意去嘅一定係韓國餐廳,係呀!因為讓眼睛都去轉韓國嘛!不過,呢間餐廳以女服務員為主,所以我今日可以好專心食嘢喇!

呢間餐廳除咗其中一個店員之外,全部都係韓國人,所以台面上嘅墊枱紙都有簡單韓文,等你可以手指指同韓國人簡單交流。叫完嘢食,即刻為你送上6碟泡菜,我鍾意一定係芽菜,條條脆卜卜又好入味!而最驚喜就係甜薯仔,薯仔好夠粉,好清新醒胃呀!

燒烤:醃牛肋骨

一條長長嘅醃牛肋骨上枱,你知我A姐㗎啦,最鍾意就係長嘅嘢,越長越鍾意㗎啦!除咗夠份量,脂肪紋理夠哂平均,店員仲會幫你燒埋。不過,店員會幫你燒得較為熟,想生啲,就要自己攞返個主導權喇。醃牛肋骨嘅醬汁微甜,夠晒入味,肉味同醃嘅味道好match,入口充滿肉汁,唔錯。

燒烤:五花肉

好多塊五花肉呀,食完一定變Heavy A呀!輕輕一烤嘅五花肉變得金黃色,好靚呀!認真一數,原來真係有五層㗎!肥肉嘅部分好爽脆,肉質好新鮮,食落口唔覺太油,罪惡感都少啲!

韓式純豆腐湯

用上石鍋上枱,所以仲係好夠熱!湯底唔算太辣,仲有好香麵豉味,材料有豆腐、金菇、翠肉瓜、同我哋最鍾意嘅蜆肉,邊飲湯再嘆個飯,好溫暖好滿足呀。

年糕餃子拉麵

年糕份量最多,煙煙韌韌,唔錯!不過,餃子得兩粒,下次要叫個淨餃子滿足下先得!而最失望係個麵,點解唔係辣辣麵呀?!雖然如此,其實味道都相當不錯。

首爾家韓國料理 Seoul House
地址:銅鑼灣邊寧頓街13-15號隆堡柏寧頓酒店1樓
營業時間:星期一至日: 11:00-23:00
電話:+852 3462 3340

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *