登登登凳 觀塘登堂

今日我哋兩口子去咗apm行街街,買完一袋二袋之後(今日M佬買得比我多囉!),我哋要去搵食喇。講真,觀塘嘅餐廳選擇好多,但當你餓到食得落一隻牛嘅時候,而apm餐廳嘅等位人流,多到好似要聽朝先有飯食嘅時候,不如行多兩步,發現其實更多!我哋就去到The Wave食登堂,除咗主打嘅西餐,仲有酒吧部份,佔地成萬呎,坐得舒服,食物又有質素。

煙三文魚木瓜藜麥沙律
以藜麥作為set dinner嘅頭盤,真係好健康。配上鮮甜嘅木瓜同煙三文魚,好清新!用黑醋配上多款唔同嘅沙律菜,食落口感豐富。

白酒忌廉汁煮澳洲藍青口
而M佬就叫咗呢個青口,勁好味!本身我唔係特別鍾意青口,但呢個青口勁入味,而且唔似出面嗰啲肉質死實,食落軟腍,值得推介。

南瓜湯配餐包
今日嘅餐湯係南瓜湯,金黃色嘅南瓜湯,味道濃郁,配上熱辣辣嘅餐包,好滿足。

低溫慢煮西班牙黑毛豬腩伴燴蘭度豆配野甘藍、青蘋果蓉及薯蓉泡沫
半肥瘦嘅西班牙黑毛豬腩用低溫慢煮而成,上枱已切片,食落夠晒方便。黑毛豬腩肥瘦分明,食落軟腍,而配上嘅蘋果蓉,酸酸甜甜,可以減低肥膩感。仲配上燴蘭度豆、野甘藍同薯蓉泡沫,夠晒豐富。

烤盲鰽魚柳配美國馬尼拉蜆、車厘茄、嫩菠菜及白酒汁撒丁尼亞珍珠麵
盲鰽魚柳大大塊,魚肉結實,最重要係啖啖肉又無骨,而魚皮煎得夠香又夠脆。仲配有車厘茄、嫩菠菜同火箭菜。配菜仲有美國馬尼拉蜆,呢個美國馬尼拉蜆超鮮甜,直頭可以成為主菜添。仲有索晒沐嘅撒丁尼亞珍珠麵呀。

冷泡烏龍茶蜜糖牛油果奶蓋
清香嘅烏龍茶絕對係一餐飯最好嘅結尾,而加上芝士、蜜糖同牛油果,淡雅得嚟又夠滑,直頭係錦上添花。

登堂 Downtown
地址:觀塘興業街4號The Wave2樓
營業時間:星期一至四及星期日 12:00 – 00:00、星期五至六 12:00 – 02:00
電話:+852 2110 4103

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *