米芝蓮一星登港 中環金色不如帰

A姐:不如今晚食金色不如帰囉?
M佬:吓,即日來回日本咁豪呀?
A姐:乜你咁out架,仲話自己係拉麵控,香港都有啦!
一向自稱係拉麵控嘅M佬,雖則今次就out咗啲,但見到佢雙眼發晒光(梗係發光啦,上次喺日本排咗成個鐘,試到佢嘅黃金湯頭,真係好值得)!所以我哋今晚就嚟到啱啱登陸中環國際金融中心嘅金色不如帰,回味一吓啦!

平時食拉麵,M佬就最鍾意坐喺師傅前面,睇住佢煮麵,再端上熱辣辣嘅拉麵俾你,感覺特別幸福!如果大家之前喺日本食過,一定會俾佢嘅黃金湯頭所迷倒!而呢個湯底,除咗食客鍾意,由2015年起更加榮獲米芝蓮必比登推介,而喺2019年同2020年連續2年勇奪米芝蓮一星拉麵殊榮!但如果你係第一次嚟金色不如帰,就一定要試皇牌中嘅皇牌 – 貝汁醬油拉麵,佢嘅湯底真係一試難忘架!而鍾意傳統豚骨湯底,就可以試白豚骨拉麵、煙熏黑椒豚骨拉麵、豚骨辛拉麵(我哋要下次再試,試完再同大家分享)!

貝汁鹽味拉麵
今次我哋就一人一碗貝汁鹽味拉麵,呢碗拉麵嘅湯底,同皇牌嘅貝汁醬油拉麵個based係一樣,湯底加入大量每日新鮮運到嘅大蜆,熬製而成秘製蜆湯,混合豚骨湯同清魚湯,最後加入海鹽而成。喺撈勻之前,記住!記住!記住!先欣嘗後品嘗!用手先感受幸福嘅溫度,再喺唔同位置聞吓同試吓湯底,你會感受到更大驚喜,因為師傅喺麵嘅唔同位置放上秘製白松露油、香草、牛肝菌醬同煙肉碎,所以每個位置都有唔同嘅味道。到真係食拉麵嘅時候,真係好有層次!好難忘同好難形容呀!而拉麵上面仲有唔少得嘅三層肉同低溫叉燒,真係感上添花。

唐揚博多華味鳥
預先醃製過嘅雞肉,夠晒入味,而且以高溫炸到金黃,脆卜卜仲keep到肉汁夠juicy,醳配上蜜糖同芥末而成嘅混合醬汁,好夾好好味。

有機野菜沙律
呢個沙律真係不得了,超新鮮,醬汁真係唔洗多,簡單就食到新鮮嘅甜味。

燒豚肉叉燒小碗飯
呢個小碗飯一啲都唔小碗,啲叉燒多到跌晒出嚟!份量仲要超多,而個秘製醬汁好香好好味!

金色不如帰 Soba House Konjiki Hototogisu
地址:中環港景街1號國際金融中心商場3樓3020號舖

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

Leave a Reply

Your email address will not be published. Required fields are marked *