粵菜遇上川菜 銅鑼灣尚港味

粵菜着重保留食材本身嘅味道同埋互相配合,所以比較少用香料,口味較輕,啱晒比較淡口嘅A姐。相反,重口味嘅M佬特別鍾意以麻、辣、鮮、香同油大聞名嘅川菜,菜式使用大量花椒、胡椒、辣椒,口味較重。就好似TVB電視劇咁,撈亂骨頭嘅男女,總會有情人終成眷屬。粵菜同川菜就好似A姐同M佬,睇嚟大鑬都扯唔埋,都終有一日會遇上!米芝蓮車胎人美食推介嘅益新團隊喺銅鑼灣開咗主打溶合粵菜同川菜嘅尚港味,今日就去試下先。

紅油蓮藕 + 麻辣秋葵
一開始嚟兩個四川小食,開開胃先。蓮藕切成薄片,加入紅油,惹味之餘仲食到蓮藕嘅鮮甜味。平時A姐唔鍾意秋葵滑潺潺,不過呢到嘅秋葵竟然無咗嗰啲滑潺潺嘅感覺,原來係廚師預先浸咗冰水,令佢更加爽口,加埋麻辣香味,唔怪之A姐食唔停!

滷水雙拼
嘩!呢到嗰滷水汁同坊間只係得嗰咸字嘅滷水差天共地,入口好香醬油味,不過唔死咸嗰隻,醇香甘洌。特別欣賞餐廳採用硬豆腐,豆味香濃,齒頰留豆香。另外,掌翼一樣滷得好入味,連骨都上咗色,有淡淡嘅鵝香,正!

尚港叉燒皇
尚港味同樣可以食到益新招牌菜叉燒皇!大廚特登揀選腍身嘅上梅頭,肉質鬆化嫩滑,入口即溶,加埋秘製蜜味,肉味香濃!

琵琶雞
粵菜無雞不成宴,大廚將益新招牌菜琵琶鴨改良,用上新鮮雞,搽上秘製醬汁風乾12小時,再去火爐慢燒。顏色分佈均勻,賣相吸引;外皮香脆,肉質嫩滑,無得彈!其實琵琶雞本身都好夠味,大家可以再點三款醬汁。M佬特別鍾意紅油花生醬,同雞肉好夾。

干鍋蝦
海蝦夠晒大隻,肉質結實,食得出新鮮。大廚更好細心去咗蝦腸,將蝦嘅背部剪開,令辣味滲入。干鍋加入咗大量蔥、薑、辣椒同彩椒,辣味超級惹味,仲有少少麻,非常香口。最特別係下面有薯條,吸埋啲精華同辣味,有驚喜!

酸菜桂花魚湯
大廚用上桂花魚,更預先去骨,認真啖啖肉,魚鮮細嫩。魚湯有桂花魚嘅鮮味仲有酸菜嘅鮮味,辣而不膩,加埋年糕啱啱好!

最後食埋木瓜雪耳糖水,真係好滿足。

尚港味 Shang Gang Wei
地址:銅鑼灣怡和街19-31號樂聲大廈1樓102號舖 (糖街入口,戲院旁有扶手電梯直到餐廳)
營業時間:星期一至日 11:30 – 22:30
電話:+852 2812 2280

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *