紅葉蟹逅AR秋滋味自助餐 旺角帝京酒店花月庭

M佬出名係蟹痴,無蟹不歡,所以嚟到我同M佬嘅第126,144,000秒紀念日,我哋就去食帝京酒店花月庭近期全新推出嘅「當紅葉『蟹』逅AR 秋滋味.紅葉祭自助晚餐」,海鮮選擇除咗主打嘅蟹之外,連即開生蠔都有,食物種類超多,性價比超高!價錢仲分為唔同時段收費,最平每位大人只係$528,10月31日前用Openrice嘅優惠券,首50位客人仲有優惠添,最平每位大人只係$398。如果你係第51位客人,就記住用恒生信用卡埋單即享低至65折優惠。

呢個「當紅葉『蟹』逅AR 秋滋味.紅葉祭自助晚餐」真係好有心思,場內放滿好多紅葉佈置,真係好有秋天氣氛!而花月庭亦加入AR原素,特別為小朋友帶嚟趣味嘅一餐。

海鮮冷盤
海鮮冷盤選擇有三點蟹、松葉蟹腳、麵包蟹、凍蝦、龍蝦鉗同藍青口等,全部都好新鮮,仲帶有淡淡嘅海水味。我就最鍾意三點蟹,超鮮甜而且多肉!而麵包蟹,最正係蟹膏超多,好幸福呀!

咖喱肉蟹
除咗冷盤,熱葷嘅蟹都有唔少選擇。其中咖喱肉蟹最正,蟹索晒咖喱味,好鬼惹味!

芝士蟹肉烏冬
食完重口味嘅咖喱肉蟹,呢個芝士蟹肉烏冬相對清淡,但就更食到蟹嘅鮮甜味,但最正係索哂蟹汁嘅烏冬,好creamy!

經典馬利蘭蟹餅
我A姐其實好懶食蟹,好彩M佬會主動幫我拆蓋起肉,但當佢沉迷嘅佢嘅咖喱肉蟹同時,呢個經典馬利蘭蟹餅就啱晒我,一絲絲嘅蟹肉,食落一啲都唔油。

生滾蟹粥
估唔到個粥又幾鮮甜喎!即叫即煮,仲可以加上油炸鬼、薄脆、花生、 葱同菜脯等去送粥,食得夠晒層次。

生蠔
生蠔即開即食,廚師仲會幫你清新乾淨以確保衛生。今日有嚟自美國中碼生蠔同紐西蘭嘅生蠔,入口爽甜鮮味,仲有淡淡嘅海水味。難怪長期都有人排隊啦。

刺身
刺身有三文魚、鯛魚、吞拿魚、八爪魚同赤蝦。三文魚厚切肥美,油脂比例非常好,入口嗰種滿足感真係好幸福呀!

火焰蝦多士
時段限定嘅火焰蝦多士,大廚即席烹調,利用火焰將蝦整熟,呢個煮法更能帶出蝦肉嘅彈牙、鮮甜。

火灸波士頓龍蝦
呢個波士頓龍蝦用上白蘭地、迷迭香加上蟹籽忌廉汁一齊燒製,肉厚彈牙,好creamy,啖啖肉。

火灸北寄貝
另一個creamy推介就係呢個北寄貝,通常食北寄貝都係生食,變成熟食後,原來口感更加豐富!

海南雞飯
海南雞飯係花月庭嘅招牌菜!雞肉嫩滑,連皮一齊食都唔算肥,油飯好香,細細一碗啱啱好。而燒味部仲有肥瘦適中嘅叉燒同皮脆肉嫩嘅燒鴨添。

串燒
串燒係另一推介!有雞翼串、雞肉串、豚肉串同粟米等等,帶有微香焦味,仲保持到肉嘅水份。

清蒸海上鮮
大大條魚,好滑又唔算多骨。

日式拉麵
自助餐粉麵檔竟然係日式叉燒拉麵?日式叉燒做得好香,但細心位係有齊溫泉蛋、粟米、木耳、蒜同十幾種配料,打造成一碗最啱你口味嘅日式拉麵。

甜品
甜品除咗有八款味道嘅Movenpick,仲有楊枝甘露、十幾款糕點、果凍、慕絲、布甸、朱古力噴泉、奶凍同水果等。真係要借個胃俾我先得。

焗楓糖合桃朱古力蛋糕
今次「當紅葉『蟹』逅AR 秋滋味.紅葉祭自助晚餐」除咗蟹,呢個焗楓糖合桃朱古力蛋糕就最有紅葉嘅秋意喇!

綠茶雞蛋仔
另一驚喜係有即製雞蛋仔,小朋友就啱哂。

火焰雪山
另一時段限定嘅就係火焰雪山,可惜我今日個胃實在食唔到喇。

飲品
另一個細心位係除咗咖啡同茶任飲,仲有鮮凍檸茶同鮮凍檸水,食飽仲可以慢慢飲幾杯嘆吓。

花月庭 La Scala
地址:旺角太子道西193號帝京酒店2樓
電話:+852 2622 6154
營業時間:星期一至日 06:00 – 23:00

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *