維港靚景嘆拉麵 尖沙咀一幻拉麵

日本嘅知名拉麵品牌,喺香港越開越多,鍾意食拉麵嘅M佬每次知道有新開嘅拉麵店,都會第一時間帶我去潮聖。而呢間位於北海道札幌嘅人氣拉麵店:一幻拉麵,主打濃郁甜蝦湯底,次次喺新千歲機場都要食番碗先捨得返香港!其實早喺今年4月,一幻拉麵已經登陸灣仔,依家喺尖沙咀海港城開設第二間分店。除咗有全球限定嘅特濃蝦汁叉燒伴麵,最正係望住個維港靚景,令一碗明明應該係速食嘅拉麵,變得好享受。

一幻最出名嘅就係甜蝦湯底,聽講每日用50公斤蝦頭煲3個鐘而成。餐牌同日本店幾乎一樣,主打蝦湯拉麵,再跟據個人喜好,選擇湯底、口味同麵條。

濃厚豚骨醬油拉麵
鍾意食原汁原味嘅朋友,建議食鹽味清湯,蝦嘅味道就夠晒突出。無論係帶甜嘅味噌定係鹹香嘅醬油都各有捧場客,而我家M佬就係重口味嘅朋友,佢就鍾意濃厚豚骨醬油拉麵。上枱就可以聞到蝦子嘅香味,配料有叉燒、半熟蛋、蔥花同蝦子碎。先試試啖湯啦,蝦子嘅香甜配上豚骨醬油味,真係好濃郁呀!而麵條都幾有彈性,索晒湯汁,唔錯。

特濃蝦汁叉燒拌麵
呢碗尖沙咀限定嘅特濃蝦汁叉燒拌麵,將混合蝦頭、蝦湯、蔬菜等材料熬煮,再打碎隔渣而成嘅特濃蝦汁。上枱前師傳已經將拉麵加上蝦油、蒜蓉、蝦味醬油同特濃蝦汁撈勻,而上枱後,我哋就將拉麵同蝦子碎、青葱、紫菜絲同叉燒撈勻。每條麵都掛上濃厚蝦汁,食落好有口感,好有層次。

蝦味飯糰
蝦味飯糰係一幻除咗拉麵以外嘅另一名物。以甜蝦湯底蒸熟嘅米嚟包飯團,蝦肉份量唔多,但就夠晒鮮甜。

一幻拉麵 Ebisoba Ichigen
地址:九龍尖沙咀海港城海運大廈地下OTG59號舖
營業時間:星期一至日 11:30 – 23:00
電話:+852 3105 1199

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *