羅曼蒂克私房菜 尖沙咀Amina

其實M佬有時都幾sweet㗎(係有時)!今日就帶我去食燭光晚餐,而呢間位於尖沙咀金馬倫道嘅Amina Modern European就一啲都唔簡單,點解?平時港式私房菜就食得多,呢間主打法國餐嘅私房菜就真係好少見喇!我哋今日就楝咗10道菜嘅晚餐,店員仲同我哋講,整個用餐時間大概需時3個鐘,建議我哋細心享用。

自家製麵包


3款自家製麵包分別係原味、合桃同乾果包,各款都好香脆,配埋特製嘅蜜糖甘筍醬,味道好match㗎!

意大利風乾火腿配凍蜜瓜汁

意大利風乾火腿配新鮮蜜瓜新鮮汁真係第一次試!火腿肉味香濃,微鹹,但飲埋冰凍蜜瓜汁,夠晒清涼潤喉。

輕炙北海道元貝


被火輕炙嘅北海道元貝,燒到半生熟,外脆內軟,口感滑綿綿,肉質鮮嫰,巧妙配上三文魚籽,令到鮮味大大提升!而底層嘅椰菜花藜麥,味道簡單清新,夠晒健康!

蕃茄凍湯


湯成日都飲,但凍湯真係第一次!飲嘅時候用上一支凍羹,咁就唔會破壞凍湯嘅味道。蕃茄涷湯味道淡香,湯內仲有蕃茄同西瓜果涷,好多汁,好QQ㗎。

鵝肝醬凍


鵝肝係我A姐嘅至愛,配埋外層嘅開心果碎,味道濃郁,口感又軟又硬。伴碟仲有油醋汁同黑醋珠,減低鵝肝嘅油膩感!

龍蝦濃湯


頭先飲完凍湯,今次就飲熱湯啦!龍蝦湯夠晒香濃,用料一啲都唔馬虎!碗旁仲有龍蝦籽,自行調味加入湯中,令味道更鮮更濃!

香煎法國鵝肝

鵝肝好厚呀!而且煎到金黃色,好有光澤架,食落油脂味豐富!,真正齒頰留香!伴底用上南瓜蓉,巧妙咁化解鵝肝嘅油膩,好有層次感。

檸檬木煙燻阿拉斯加蟹肉沙律


打開木蓋就會傳嚟陣陣嘅煙燻味道。將雞蛋同沙律混入蟹肉、蔬菜及柚子汁,食落鮮甜又清爽。

番石榴雪葩


食前菜都食到我哋好飽,所以最後一道前菜,就係番石榴雪葩,味道冰涼香甜,仲可以清清之前嘅飽肚感。

香煎澳洲黑盲鰽魚


主菜嘅黑盲鰽魚好鮮嫰,而魚皮就香脆可口,好惹味呀。

紅酒燴牛面肉


主廚用上72小時慢煮而成,所以牛面肉好腍身,牛味香濃又有咬口。

柚子芝士蛋糕
淡淡嘅柚子配上芝士蛋糕,原來好驚喜,柚子味清新,芝士味香而不膩,好滿足呀!

 

吃完甜品之後,店員奉上雪影朱古力同茶包盒,有唔同種類嘅茶包同花茶,為呢餐畫上完美嘅句號。

Amina Modern European
地址:尖沙咀金馬倫道54-56號龍記大廈5樓A號舖
營業時間:星期一至日 18:30-00:00
電話:+852 6018 0244

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *