辣得夠滋味 灣仔川菜四合院Palace Restaurant & Bar

古語有云:「自古蘇杭出美女」,所以以前啲皇帝出巡都好鍾意去江南地區。但時移世易,近年嘅說法係:「四川美女多」,聽講係因為個度啲人鍾意食辣嘢,腸胃無咁容易吸收,所以四川人比較瘦……當A姐睇完呢段報導,佢第一件事就係話以後餐餐都要食辣嘢。我心諗,辣到孖潤腸都未變瘦啦!但係身為佢嘅bf,我一定會支持佢,今日就帶佢去呢間幾有特色嘅川菜小店 — 四合院Palace Restaurant & Bar,希望佢越食越瘦啦!

店面面積唔大,大約只可以容納到30人左右,兩名店員笑容滿臉,雖然講普通話,但都略懂少許廣東話嘅。呢度菜式選擇唔多,主打就係十三香秘製乾鍋!

十三香秘製乾鍋

乾鍋分為原味、麻辣同埋孜然,聽店員講原味都有少少辣。但既然食得川菜,就一定要揀麻辣啦!可以選擇虎蝦、鮮蝦或6款唔同嘅配料起鑊。我哋最後揀咗十三香秘製麻辣虎蝦+西班牙黑毛豬腩片+枝竹+五香豆干乾鍋

好香嘅麻辣味呀!仲見到好多辣椒、花椒、椒籽、芝麻、麻椒、芫茜等香料,今次肯定辣到飛天喇!但食落口又無想像中咁辣喎,仲好香添!虎蝦總共有八隻,隻隻都手掌咁大,仲一早開咗肚除腸,細心之餘仲夠晒入味,而蝦身都夠晒爽口!正!

另外加嘅西班牙黑毛豬腩片,雖然脂肪比例都唔少,但乾鍋下,脂肪抽乾,唔會太肥之餘仲幾有口感。

而最驚喜嘅就係枝竹同五香豆干,因為你嘅嚐辣之旅依家先開始,因為真係完整咁吸收晒所有辣味,辣得好過癮呀!

四合院
地址:灣仔廈門街7-17號百旺都大廈地下A舖
電話:+852 3791 2206

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *