重視每一位客人 親民老闆靚煲皇

今晚番咗風,各位記住著多件衫之後去打邊爐呀!而我同A姐著多件衫之後,即刻去到旺角食靚煲皇,靚煲皇雖然唔係任點任食,但價錢都好相宜,份量又足,值得推介。而更重要係老闆亦會落手落腳,除咗同店員打成一片,更會推薦客人是日新鮮推介同了解意見,真係緊張客人意見,與時並進!

金沙秋葵

近年興鹹蛋,連炸魚皮都加上咸蛋,咁點解秋葵唔得呢?老闆創意咁將鹹蛋同秋葵合二為一,令秋葵多咗一份咸香味道,乾身脆口,但又唔會蓋過秋葵嘅原味,連一向嫌秋葵滑潺潺嘅A姐,今日都好滿意。

懷舊南乳雞

好耐無食過南乳雞喇!近年少見嘅南乳雞,呢度都有!南乳雞外皮酥脆,上面仲灑上花生碎,雞肉鮮嫩,最鍾意係個南乳味,正!

黃金脆豆腐

大大碟嘅脆豆腐,真係好邪惡呀,但每一粒都炸到外脆內軟,仲有芝麻嘅微香,又點停得口呢!

正宗澳門豬骨煲

食完3個前菜,終於開始今晚嘅火鍋喇!呢個正宗澳門豬骨煲,湯底呈奶白色,味道香濃,最重要係唔肥膩,仲有蘿蔔、粟米等配料,補充骨膠原一流。

手切肥牛

淥一淥,10秒食得!肉質鮮美,好有肉香,咬落唔韌。

新鮮肥牛脷

薄切牛脷,入口即溶嘅感覺好唔錯呀。

新鮮肥牛展

同手切肥牛相比,牛展嘅脂肪就無咁多,賣點係彈牙、爽口,啱晒A姐口味。

黑牛柏葉

第一次食黑牛柏葉嘅A姐,真係好勇敢,仲要愛上黑牛柏葉個種爽脆嘅口感。

牛骨髓

原來牛骨髓係非常補鈣,真係食多咗都唔怕。呢度嘅牛骨髓好滑,仲要索晒啲湯汁,好美味。

金沙豬潤

老闆拍心口推介,上枱見到豬潤色質紅潤,已知係新鮮靚貨!厚切嘅食法,好有口感,又無渣,連A姐M佬都拍心口推介,好味過好多馳名豬潤麵。

手打墨魚滑

好大碌墨魚滑呀,墨魚味十足又彈牙!

響鈴

即叫即炸嘅響鈴,脆卜卜又索湯,老闆在旁仲好緊張幫我哋計時,怕我哋錯過咗黃金3秒。

西洋菜

菜真係好少介紹,仲要好味到encore一盆!真心寫個服字,估唔到連個西洋菜都好新鮮,一絲不苟。

呢餐確實心滿意足,臨走仲見到,原來餐廳有做盆菜外賣,分唔同Size,唔同價錢,加上今餐食物質素一流,對盆菜都充滿信心,過年一家大細齊齊整整再開餐!

靚煲皇 Supreme Hot Pot
地址:旺角塘尾道18號嘉禮大廈地下
電話:+852 23990812
營業時間:星期一至日 18:00-04:00、公眾假期 18:00-04:30、公眾假期前夕 18:00-04:45

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *