閉著眼聽一聽海風 太子始創野玩海店Something Wild The Sea

夏天終於嚟到喇,好想去沙灘著住我件比堅尼show下我性感嘅身材呀!之但係星期一至星期五又要返工,星期六同星期日又……又……又成日落雨!原來想『閉著眼聽一聽海風』真係咁難?M佬今日放工帶我去太子始創中心嘅野玩海店Something Wild The Sea,佢話沙灘就無喇(仲提我千祈唔好著比堅尼呀),不過,至少可以畀我視覺同味覺上感受一下漁人碼頭啦!

呢間位於太子始創中心嘅野玩海店Something Wild The Sea,門口已經有大大隻龍蝦同碼頭嘅路牌,而餐廳入面真係整到成個碼頭咁,有船、滑浪板仲有水泡等等,而店員仲著到成個水手咁添!如果你鍾意食海鮮,呢間餐廳真係啱晒!而逢星期四同星期五晚上8點,仲有Live band唱歌!我就好鍾意佢地今晚唱『目黑』喇(命運就地改寫,只因你我當天那一眼……)!

烤焗長腳蟹餐


呢度除咗À la carte,仲有唔同嘅套餐,其中二人套餐就有焗波士頓龍蝦餐、烤焗長腳蟹餐、凍食海鮮拼盤餐,真係啱晒我同M佬啦。我哋今日就揀咗烤焗長腳蟹餐,仲可以揀大蒜汁或雙重芝士醬。點餐後,水手店員鋪上大餐紙,畀埋圍裙、手套同用具,真係夠晒貼心呀。

拼盤有3隻長腳蟹腳、2隻大蝦、2隻青口、2隻海蜆,仲有4片薯仔同4件粟米。雖然係用急凍海鮮,但都唔會有冰鮮味,長腳蟹大大隻,好厚肉呀;大蝦夠晒彈牙;青口同海蜆無沙,都幾鮮甜。不過,我哋就略嫌個汁無乜蒜味,反而似黑椒汁,而且汁太多,蓋過唔少海鮮味。

周打海鮮湯


跟餐有2個餐湯,而我哋就將其中一個餐湯Upgrade做周打海鮮湯,海鮮湯用麵包做碗,令麵包索晒湯,正!而湯就非常足料,有蝦、魷魚、蜆等等,如果個湯可以熱啲就更好喇!

沙律


跟餐嘅沙律簡簡單單,有沙律菜、粟米同車厘茄,再淋上千島醬,夠晒新鮮開胃。

野玩手製薄餅


跟餐嘅薄餅無得揀,指定嘅配料,但又啱晒我口味!薄餠由莫札里芝士、粟米、青椒、墨西哥辣椒同意大利腸組成,薄餠夠薄夠脆,最正係用我最鍾意嘅千島醬,好好味呀!

鄉村風味炸蘑菇


籃入面除咗炸蘑菇,仲有沙律菜,蘑菇夠晒香脆,菇味香濃,好fresh呀。

朱古力奶凍


跟餐嘅甜品,有藍莓同士多啤梨嘅朱古力奶凍,好滑呀。

野玩新地


甜品就一定要試吓呢度嘅新地啦,因為係用咗Mövenpick雪糕!仲要有3大個球:有朱古力、士多啤梨同雲呢拿味!加埋香蕉、藍莓同士多啤梨,仲有Chocolate Brownie,好滿足呀!

野玩海店 Something Wild – The Sea
地址:太子彌敦道750號始創中心地庫1樓B02-B06號舗
營業時間:星期一至日 11:30-00:00
電話:+852 2362 8080

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *