隱世工廈西餐廳 觀塘Sunprime Cafe

A姐:做咩無啦啦帶人去工廠大廈?
M佬:唔好咁多嘢講啦!
A姐:依家講下嘢都唔得呀?你依家變咗啦!
M佬:總之唔係呃你啦!

話說,我約A姐去觀塘食飯,諗住帶佢去成業工業大廈一樓嘅隱世西餐廳Sunprime Cafe。一入到去,同出面嘅環境天淵之別,十分優靜。我哋就叫咗一人一個晚餐,有頭盤、餐湯、主菜、甜品同餐飲。

頭盤:鮮大蝦柚子沙律配海膽泡沫汁
賣相好吸引,A姐影咗成5分鐘相……終於有得食啦!大蝦鮮甜爽口,好細心咁幫你剝埋殼,新鮮沙律菜同柚子肉配埋海膽泡沫汁,非常醒胃。

頭盤:阿根廷紅蝦刺身拼加拿大翡翠螺配咯嗲汁及青芥沙律汁
加拿大翡翠螺兩大隻,彈牙肥美;阿根廷紅蝦刺身,膠身甜美。我就比較喜歡青芥沙律汁,好清新。

餐湯:黑松露野菌湯
一嚟到就好香黑松露味,質地厚身,啖啖都有野菌碎,非常足料。

餐湯:法式洋蔥湯
濃郁嘅牛骨湯配腍身洋蔥,法包吸晒洋蔥湯,加埋上面輕輕焗過嘅芝士,無得彈。

主菜:自家醃製香草伏特加三文魚扒配大蒜忌廉汁天使麵
香煎三文魚扒,外表乾身,裏面仲係嫩滑多汁,食落好香香草味。另外,天使麵幼滑彈牙,沾滿香口嘅大蒜忌廉汁。

主菜:芝士蘑菇焗美國極黑豬肉眼配焦糖蘋果醬及忌廉燒汁
極黑豬肉眼腍身嫩滑,啖啖都係肉,外層有輕輕焗過嘅芝士蘑菇,香口惹味,特別鍾意焦糖蘋果醬及忌廉燒汁嘅配搭,一咸一甜,味道豐富。

甜品:朱古力心太軟配朱古力雪糕
終於到甜品啦!朱古力心太軟熱辣辣,一切開就有濃郁嘅朱古力醬流晒出嚟,配埋自家製朱古力雪糕,Double朱古力,Double滿足感。

甜品:焦糖蘋果法式班戟配雪糕
唔係好多餐廳有Crepe食,呢到嘅Crepe新鮮整起,焦糖煮過嘅蘋果,唔係好甜,味道啱啱好,同雪呢拿雪糕好夾。

飲埋伯爵茶同洋甘菊茶,真係大滿足!

Sunprime Cafe
地址:觀塘成業街19-21號成業工業大廈1樓06室
營業時間:星期一至日 11:30 – 22:30
電話:+852 3709 2485

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *