雞翼都可以打邊爐 旺角Fun Fun 串串鍋

蔡生話火鍋只係將食材切好就放入湯底,係一個無文化價值嘅食物,所以應該消失……咁食沙律同魚生,豈不是侮辱自己個胃?其實,無論係港式火鍋嘅老火湯湯底、北京嘅銅鍋炭火清鍋底、四川重慶嘅九宮格火鍋、東北嘅酸菜亂炖火鍋…..都各有特式,作為熱愛火鍋嘅我哋,就係鍾意火鍋款式多樣化,唔同湯底嘅味道,仲有成班人一齊傾計同烚吓烚吓嘅樂趣,呢啲未就係火鍋嘅文化囉!我哋今日就去到旺角嘅Fun Fun串串鍋,試吓香港少見嘅重慶串串鍋味道。

招牌重慶麻辣鍋
呢到有四款湯底畀你揀,包括:招牌重慶麻辣湯鍋、花膠木瓜蟲草花雞湯鍋、飄香芫茜皮蛋湯鍋同極品胡椒酸菜豬肚湯鍋。四位或以下揀一款,五位或以上可以揀兩款,或者加$20要鴛鴦鍋。但嚟得食串串,就一定係叫招牌重慶麻辣鍋,有大中小辣揀,今日我哋就挑戰中辣。湯底麻香又夠辣,冬天食就啱晒。

呢度除咗填紙仔,叫牛梅花、安格斯牛、羊肉片、豚肉、鴨紅同魚皮餃之外,最大亮點就係有個大雪櫃!

呢個大雪櫃有好多串串食物,有牛栢葉、八爪魚、土魷、丸類、牛肚、牛筋等等。但最驚喜係雞翼竟然係火鍋嘅座上客!雞翼大隻,肉身夠厚,放入呢個中辣嘅麻辣湯鍋,記住唔好心急,慢慢嚟,等麻辣味完全滲透入雞翼中心,咁先係最入味最惹味。

值得一提,呢到有樽裝可樂,夠氣夠過癮!最後,食埋豆腐花,好滿足!

Fun Fun 串串鍋
地址:旺角西洋菜南街1A-1K百寶利商業中心5樓
營業時間:星期一至日 17:00 – 02:00
電話:+852 2234 5639

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:AM 玩樂日記
Instagram:AandMDiary
Openrice:AM
報料或合作:keepintouch@aandmdiary.com

Leave a Reply

Your email address will not be published. Required fields are marked *