香港跑馬地Zagin Soba座銀 完美雞湯拉麵

為咗搵食你可以去到幾遠? 大家唔洗驚!!! 我哋唔係去啲「山旮旯」嘅地方,只係去平時比較少去嘅跑馬地啫!

星期五晚,M佬帶人搭叮叮,叮去跑馬地,好浪漫呀! 浪漫還浪漫,好肚餓呀! 咦,前面有間新開嘅拉麵嘅舖 --Zagin Soba座銀,好似幾Okay咁喎,入去試下先!

哦,原來只係啱啱開無耐。餐廳嘅裝修以木為主,好似去咗日本咁。最鐘意嗰Open kitchen睇住師傅準備身材。

雞白湯拉麵

首先,嗰賣相已經好吸引,金黃色嘅炸牛蒡好搶眼,好似成件Art piece咁! 嗰牛蒡係新鮮即炸,好似薯片咁脆,一啲油膩感都無,不過牛蒡味唔重。除咗脆食,可以好似炸魚皮咁放落啲湯到,記住唔好浸太耐,如果唔係就會淋晒。

好啦,係時候試下嗰湯底啦!! 上面有層泡泡,雞湯入口柔滑,濃郁厚身,雞味香濃,鹹度適中,忍唔住飲完一啖再一啖! 拉麵仲有一大片叉燒同雞肉。叉燒肥瘦分明,肉質嫩滑,味道比坊間嘅日式叉燒偏鹹,不過我A姐又覺得好好味喎! 另外,舊雞肉係超級嫩滑,慢煮真係唔同啲,keep住肉汁,好香濃。當然仲有糖心蛋啦,勁香煙煄味,正!

 

海鮮雞拉麵

另一碗我哋叫咗海鮮雞拉麵,配料全部一樣,唯一唔同嘅係嗰湯底,雞湯底再加蝦同魚一齊煮。海鮮味好濃,不過蓋過晒啲雞味,我哋鐘意食雞白湯多啲,原汁原味!!

座銀炸雞

炸雞一嚟到,見到佢顏色咁深,以為佢炸得過火,點知咬落去皮脆肉嫩,係啱啱好,仲有啲雞油肉汁,好Juicy。店長話因為佢哋先用日式醬汁醃過雞件,然後再炸,所以顏色比坊間嘅炸雞較深。再點啱黑椒鹽一齊食,真係無得彈!

食飽飽,散步番出去銅鑼灣,消消嗰肚腩!

Zagin Soba 座銀
地址:跑馬地景光街13A號地舖
營業時間:星期一至日: 11:30-22:00
電話:+852 2818 0322

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *