上海迪士尼樂園Shanghai Disneyland 地上最強攻略一日遊

好多人都話上海迪士尼樂園Shanghai Disneyland好大好多人,每個Ride都要排成個鐘先有得玩。之但係我哋A姐M佬係Theme park王,就當然玩到盡。我哋預先經Klook購買門飛,而呢一日玩咗:2次加勒比海盜——沉落寶藏之戰、2次創極速光輪、1次巴斯光年星際營救、1次晶彩奇航、1次七個小矮人礦山車、1次愛麗絲夢遊仙境迷宮、1次小飛俠天空奇遇、1次漫遊童話時光、1次翱翔 • 飛越地平線,再睇埋十二朋友園、米奇童話日間巡遊、故事舞台:人猿泰山:叢林的呼喚、冰雪奇緣: 歡唱盛會、風暴來臨——傑克船長之驚天特技大冒險同點亮奇夢:夜光幻影秀!

今次我哋A姐M佬唔係同你講有咩好玩,有幾好玩,我哋係希望將我哋嘅小小心得同大家分享,從而製作呢份地上最強嘅攻略!希望大家都可以喺上海迪士尼樂園,玩得最多!

攻略1: 擇個吉日

由於每日嘅開放時間都唔同,要玩到盡,就一定要睇定你去嗰日嘅開放時間。我哋強烈建議大家揀選平日去,無咁多人吖麻。而平日通常係開朝早09:00,所以我哋06:00起身,食早餐,就出發啦。

提提大家,去上海迪士尼樂園最方便就係搭地鐵,,11號線嘅終點站就係迪士尼站。

攻略2: 預先購買門票

話明玩到盡,就梗係一早買定飛,唔駛去到排長龍等買飛!

至於喺邊度買飛?我哋就提議喺Klook買飛,幾分鐘就收到電子門飛,到時去到門口,除咗比即場買飛平,最重要係唔駛同人迫餐飽排隊買飛嘛!

攻略3: 預先下載上海迪士尼樂園官方app

上海迪士尼樂園咁大,行到去嗰Ride先知大排長龍,就浪費晒啲時間啦!所以我哋強烈建議大家Download定上海迪士尼度假區官方app,隨時隨地都可以Check唔同景點嘅排隊時間。

其實大家仲可以喺出發前去Check下邊幾個Ride比較熱門,就可以計劃定當日嘅策略。

攻略4. 必玩VS想玩

上海迪士尼樂園有6個園區 (米奇大街、奇想花園、探險島、寶藏灣、明日世界同夢幻世界),如果大家諗住一日可以玩晒,你就真係妙想天開。所以大家一定作出取捨,列出必玩同想玩嘅遊樂設施。

喺計劃行程嗰陣,我哋決定放棄咗小飛象、噴氣背包飛行器同太空幸會史迪奇,因為香港都有類似嘅遊樂設施,留返啲時間玩其他機動遊戲。

攻略5: 比正式開園時間早30分鐘到達

記住!記住!樂園係會比官網寫嘅開園時間提早開門,疏散人流,所以我哋建議大家比開園時間早30分鐘到達樂園。我哋嗰日就係朝早8點30分嚟到迪士尼,過埋安檢,8點40分就成功入場,樂園明顯唔係好多人。

攻略6: 善用Fast Pass快速通行證

去過迪士尼樂園嘅朋友都知道熱門嘅遊樂設施都會有Fast Pass拎,上海迪士尼樂園都唔例外。不過大家要留意,上海迪士尼樂園嘅Fast Pass機並唔係設喺遊樂設施嘅附近,而係設喺每一個園區嘅出入口或者中間位置。

去到Fast Pass機之後,就掃描門票上面嘅QR Code,之後就揀你想拎Fast Pass嘅遊樂設施 (記住唔好揀錯,無得返轉頭㗎)。拎咗Fast Pass之後,記住喺指定時間內去返相應嘅遊樂設施,就可以行Fast Pass隊,快人一步。

另外,大家要留意幾時可以再拎下一張Fast Pass。理論上,2小時後就可以拎下一張。大家只要睇下Fast Pass上面嘅細字就見到嗰個時間。

講咗咁耐,同大家介紹一下有咩好玩!

米奇大街

一入到樂園,就會經過呢條米奇大街,比我哋想像短,有商店同餐廳 (其他迪士尼樂園一入去都係美國小鎮大街 —— 根據華特迪士尼先生童年嘅街道而建成,上海迪士尼樂園就係去美國化,特登改為米奇怪大街)。我哋見到Meet and Greet無咩人,所以即刻衝去,唔洗5分鐘就成功同Daisy,Minnie影相啦。

奇想花園

之後我哋就去到城堡前嘅奇想花園,係整個樂園嘅中心,為上海迪士尼嘅獨特設計 (其實嘅迪士尼都以城堡為中心)。我哋影下城堡同上海迪士尼獨有嘅十二朋友園就走啦!

夢幻世界

七個小矮人礦山車

去到夢幻世界,見到每項遊樂設施都只係排5分鐘,我哋就無浪費Fast Pass嘅Quota (因為攞咗兩個鐘頭後先有得再攞),即刻去玩七個小矮人礦山車,呢個室外加室內嘅過山車一啲都唔驚,適合一家大細,一齊嗌吓先!

小飛俠天空奇遇

出嚟之後就去玩小飛俠天空奇遇,呢個係懸掛式遊樂設施,唔洗驚,唔吊腳㗎!只係坐喺一個懸掛式嘅氫氣球,真係好似飛咁,感覺唔錯。

登上奇幻童話城堡

上海迪士尼樂園嘅一大特色就係全球最大嘅城堡,而且仲係可以上埋去玩。大家可以去登上奇幻童話城堡,重新體驗白雪公主嘅故事,投射同音樂效果都唔錯。

晶彩奇航

大家仲可以坐船仔去埋城堡嘅底部,我只可以話嗰城堡真係好大。

愛麗絲夢遊仙景迷宮

呢個絕對係另一個必到景點,大家可以影個夠本,記住同埋大頭紅皇后影相呀!

明日世界

巴斯光年星際營救

為咗準備睇下午嘅巡遊,我哋就嚟到明日世界 (因為巡遊嘅路線由明日世界開始,快啲睇就快啲去玩)。9秒9攞咗創極光速輪嘅Fast Pass,之後就先玩巴斯光年星際營救。同香港迪士尼樂園嘅玩法一樣(但香港版已經無得再玩),兩個人坐一架車, 可以自由控制左右。上海迪士尼嘅場景靚好多,把槍係有Laser,大家可以見到自己射咗去邊。

午餐 – 星露台餐廳

星露台餐廳係全個樂園最大嘅餐廳,所以唔驚無位。我哋試咗個中式豬肉包,不過都幾難食下,強烈建議大家唔好叫。

車巡遊

巡遊永遠都係迪士尼必睇嘅表現,7架花車都好靚,不過嫌佢太短,同埋要迫啲公主講國語,有啲難頂!

創極光速輪 

巡遊完畢,就馬上衝去玩創極光速輪。入去之前,大家要將頸巾背囊放入儲物櫃,而儲物櫃都要排隊,所以建議大家比Fast Pass上列印嘅最後時間,早少少到,如果唔係放得入Locker,就過咗時間。又或者有人好似A姐唔玩,就可以幫我拎住,快啲入去玩。

呢個係上海迪士尼獨有嘅遊樂設施,由排隊嘅設計已經係好靚,充滿科幻未來嘅感覺,好似置身喺電影場景一樣。

車上會一個小型位置畀你放電話同小型物作。大家係創極光速輪嘅藍隊嘅代表,要同黃隊比賽。提提大家,玩嘅時候記得要留意旁邊嘅投射。

探險島

翱翔 · 飛越地平線

呢個遊樂設施係唯一一個要排2個鐘。見佢排咁耐,就以為好好玩啦。大家入到去坐喺雙腳離地嘅凳,環遊世界,概念係好,不過片段嘅過場就好突兀,一啲都唔奇妙,絕對係失望之作。

雷鳴山漂流

原來計劃咗玩,不過當日暫停開放。

寶藏灣

加勒比海盜——沉落寶藏之戰

寶藏灣以電影加勒比海盜做主題,大家一定要玩加勒比海盜——沉落寶藏之戰,可以話係全樂園最好玩。裏面空間好大,欣賞聲光效果。4K投射超級真實,好似戴咗3D眼鏡,好有現場感。

樂園表演

人猿泰山——叢林的呼喚

嚟迪士尼當然要睇Show啦,呢個表演以雜技為主,講述泰山嘅一生。

凡迭戈劇院:“風暴來臨——傑克船長之驚天特技大冒險”

開頭有啲奇怪,不過後期就好精彩,有驚喜。

冰雪奇綠——歡唱盛會

由於雨勢關係,土豪金嘅金色童話慶典就無得睇,只好轉場睇冰雪奇綠-歡唱盛會。由Let it go變為隨它吧,真係一句都唔識唱呀!

點亮奇夢:夜光幻影秀

最後,好彩雨停咗,煙花都如期上演!

整體嚟講,上海迪士尼真係好好玩,有好多獨有嘅遊樂設施,至少好玩過巴黎同香港。中國人嘅質素又無想像中咁差,打尖情況基本上無出現過!只係園內會有人向你兜售A貨紀念品同Fast Pass,同所有細細過都識唱嘅英文版迪士尼歌,全部變哂國語版,真係好奇妙嘅一天!但我覺得值得去!

 

上海迪士尼樂園 Shanghai Disneyland
地址:上海市浦東區川沙新鎮黃樓社區旗桿村和趙行村
時間:每日開放時間不同,請留意官方網站
平日門票:成人人民幣$370 (約港幣$445)、小童或長者人民幣$280 (約港幣$340)
平日門票:成人人民幣$499 (約港幣$601)、小童或長者人民幣$375 (約港幣$451)
Klook購買一日正價門票:成人平日港幣$410、成人週末或假日港幣$559
網址:www.shanghaidisneyresort.com

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:keepintouch@aandmdiary.com

2 thoughts on “上海迪士尼樂園Shanghai Disneyland 地上最強攻略一日遊

  • January 22, 2018 at 3:43 PM
    Permalink

    請問你係KLOOK 度訂票係用回鄉證嗎?

    Reply
    • July 19, 2018 at 10:25 AM
      Permalink

      係呀

      Reply

Leave a Reply

Your email address will not be published. Required fields are marked *