寮國自由行 永珍七大必食推介

喺剛過去嘅假期,A姐話要飛番轉,我一直期待係日韓台泰嘅時候,佢竟然話我知,我哋聖誕會去寮國(老撾)!寮國?我第一反應係:買!杯!麵!但喺呢4日3夜嘅永珍(萬象)行程,啲杯麵最終都係原機往返,估唔到永珍都有唔少嘢食選擇。而以下六間餐廳就係我哋喺永珍嘅私心推介。

「如果寮國同永珍無聽過,咁老撾同萬象,應該有吧?前者係台灣譯音,而後者則為中國譯音。因為我哋細個讀書同睇地圖都係跟台灣譯名,所以仍習慣叫寮國及永珍」

除咗食,寮國仲有咩景點,永珍三大必遊景點,詳情請睇:https://wp.me/p8vzXP-4vq

Kualao Restaurant

喺google search永珍寮國菜,呢間Kualao Restaurant就一定榜上有名!所以落機後嘅第一餐,A姐就帶我去到位於永珍市中心嘅Kualao Restaurant。入到餐廳,佢哋嘅slogan就係:「You cannot truly say you have experienced the best that Laos has to offer unless you have dined at Kualao!」我嘅第一反應係有無咁誇張呀?無食過KuaLao就唔可以話你已經食過最好味嘅寮國餐!

飲住寮國啤酒,食佐酒嘅薄脆,再聽住寮式傳統音樂,真係好relax,我究竟係未喺寮國架?

Premium Set Menu
想一次過試晒咁多款寮國菜?咁就一定要叫呢個Premium Set Menu喇!店員會一次過送上十二個菜,分別係:鴨肉拉普、魚湯、炒蔬菜、龍坡邦式燉菜、蒸魚糕、烤香腸、蕉葉包雞、炸春卷、蒸蔬菜配辣醬、竹籠紫米飯,連同生果同飲品,總共十二個菜式。拉普係其中一樣最代表到寮國嘅食物,用肉碎加上酸橙汁,檸檬葉去炒,同泰國嘅生茶肉碎包好相似,但味道就清新得多。

而烤香腸、蕉葉包雞、炸春卷都好香口,呢3個小食都唔錯!而蒸蔬菜配嘅辣醬亦係重點項目,雖然辣醬唔辣,但好香濃,令平淡嘅蒸蔬菜更有層次。但魚湯、龍坡邦式燉菜同蒸魚糕就未必大啱香港人口味。

Kualao Restaurant
地址:https://g.page/KualaoRestaurant
網上訂位:https://www.kualaorestaurant.com
營業時間:11:00 – 14:00;18:00 – 22:00

3 Sao Hotpot

我同A姐去到邊都鍾意打邊爐,所以嚟到寮國都試咗呢度嘅寮式火鍋!呢間任食嘅3 Sao Hotpot分為2個價錢,我哋選擇咗平嘅set(69,000Kip=約HK$60),因為貴嘅set主要係多咗海鮮,但要留意寮國係一個內陸國家,所以海鮮?

湯底我哋揀咗最普通,唔洗加錢嘅寮式清湯,清湯用咗芫荽、胡椒同蒜頭等,湯底好清香,都唔錯。

呢度係自取食物,所有嘢食都可以隨便自取,除咗火鍋料,仲有小食、熟食、壽司、生果、甜品等。

其實呢個放題set,肉類有牛肉、雞肉、豚肉、土魷、丸類、雲吞、魚皮餃、栗米、玉子豆腐等!可能寮國係農立國,所以喺芸芸嘢食當中,我哋最推介係所有菜類,特別鍾意通菜,又脆又嫩!另外,牛柏葉都係好好味,好新鮮!

以呢個價錢有呢個食物質素,真係無得輸。

3 Sao Hotpot
地址:https://goo.gl/maps/3SaoHotpot
營業時間:11:00 – 23:30

Joma Bakery Café Nam Phou

喺寮國無大家熟悉嘅食物品牌,當然Starbucks都無啦,但寮國出產咖啡,如果你都想試番杯寮國咖啡?可以去到1996年創立至今嘅Joma Cafe,除咗寮國,喺越南河內同柬埔寨金邊都搵到Joma Cafe架!

Signature Iced Coffee
首先唔飲咖啡嘅我哋,真係唔識分好定唔好,但至少我哋係可以飲晒,而A姐個胃都無唔舒服,所以我哋相信係好嘅。

法包
嚟到曾被法國統治嘅寮國,又點可以唔試法包呢?同我哋上次喺越南食嘅法包好唔一樣,呢度無咗上次嘅札肉同辣椒粒,換上嘅係芝士、橄欖同雞肉,好有法式風情。

Homemade Ice-cream
寮國實在太熱,真係想食杯雪糕降溫,但隨街食亦有啲驚肚痛,所以嚟到Joma Bakery Café Nam Phou就可以試番杯果味濃郁嘅雪糕!

Joma Bakery Café Nam Phou
地址:https://g.page/JomaNP
營業時間:07:00 – 21:00

Pho Zap

同越南毗鄰又同樣受過法國統治嘅寮國,都有好味嘅Pho(河粉)店,呢間Pho Zap喺永珍已經超過50年歷史,基本上當地人都無人唔識,而且位於市中心,對遊客嚟講都夠晒方便。

牛肉及牛肉丸河
薄切牛肉片配上牛肉丸,當然係河粉嘅最佳配搭!但當然唔呢少得加上芽菜、芫茜、青檸、魚露、辣椒粒,調出屬於你的獨特調味。薄切牛肉片好嫩而且牛味香濃,而牛丸仲會爆汁,勁juicy。

Pho Zap
地址:https://goo.gl/maps/PhoZap
營業時間:星期一至星期六 06:30 – 15:00;星期日 06:30 – 18:00

三和牛肉粉 Phó Xan Her

呢間唔該打粒星俾佢,絕對係我同A姐咁多間餐廳中嘅number 1!但亦都要留意,呢間餐廳嘅裝飾係最簡單,追求環境嘅你就未必適合。呢間餐廳除咗寮文之外,韓國嘅旅遊書亦曾作推介,所以餐廳亦有唔少韓國旅客及韓文餐牌,而店主其實係當地華橋,所以中文亦沒有問題。

呢到嘅選擇唔多,但嗰碗牛筋腩河真係會令人念念不忘!因為湯底每日加上新鮮嘅牛骨、牛肉同唔同香料熬成,湯底清香嘅牛味,濃而不濁!同香港嘅華姐清湯腩相似,但就少咗啲味精感,食完亦唔會好口喝。

三和牛肉粉 Phó Xan Her
地址:https://goo.gl/maps/PhoXanHer
營業時間:07:00 – 14:00;17:30 – 20:30

酉圓屋 Torimaru

喺寮國,日本同韓國都參與唔少基建投資,所以除咗商家亦有唔少日韓旅客,而市內就有好多日式或韓式餐廳,其中呢間酉圓屋由知名嘅Italian Tomato營運。店內有牛肉飯、刺身魚生同日式小食,而我哋今日就食咗呢度主打嘅拉麵。

店面係日式裝潢,真係勁有日本feel,一度以為自己去咗日本添。拉麵湯底有唔同選擇,有醬油、雞湯、麵豉同辣味。我哋就揀咗雞湯,湯底嘅濃香雞味真係好creamy!叉燒嘅粉量超多,而只係價值HK$50左右,真心抵食。

酉圓屋 Torimaru
地址:https://goo.gl/maps/Torimaru
營業時間:星期一、星期三至星期五 11:00 – 13:45;17:00 – 21:30;星期六至星期日 11:00 – 13:45;17:00 – 21:00

Kung’s Cafe

我哋本身都係睇網上其他blogger介紹,先搵到呢問位於民居巷仔中嘅Kung’s Cafe,但真係唔知點解個blogger識得捐窿捐啦搵到呢一間Cafe囉,但絕對係值得嘅。

雞肉炒麵、咖哩雞肉飯
我哋今日分別叫咗雞肉炒麵同咖哩雞肉飯,兩個選擇都夠晒鑊氣,好好味而且夠晒抵食。

芒果汁、Lemonade
最鍾意杯超濃郁嘅芒果汁,好香而且好大方用咗勁多芒果。而喺炎熱嘅寮國飲杯Lemonade真係夠晒解喝。

Kung’s Cafe
地址:https://goo.gl/maps/KungsCafe
營業時間:07:00 – 16:00

除咗食,寮國仲有咩景點,永珍三大必遊景點,詳情請睇:https://wp.me/p8vzXP-4vq

想知寮國(老撾)仲有咩抵玩推介?詳情請睇:https://wp.me/p8vzXP-6G

因為香港飛寮國係無直航機,所以今次我哋坐越南航空經河內飛到永珍。
提提你:持有BNO或特區護照前往寮國均需簽證(越南轉機而不入境則可免簽證)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

Leave a Reply

Your email address will not be published. Required fields are marked *