平價及中價澳門食記 澳門公局市前地及氹仔葡薏園

去澳門短遊係好多香港人嘅weekend活動,嚟到澳門有啲人就鍾意去睹場玩兩手,或者book間靚靚酒店hea吓休息吓!今日我就同A姐過大海,嚟到澳門由朝食到黑,以價格水平推介唔同嘅餐廳,豐儉由人,最緊要夠晒好味又夠飽嘅精選推介!

平價推介:陳記麵檔

嚟到澳門嘅第一餐,我哋嚟到公局市前地,呢到最大嘅地標就係雀仔園街市。而成條柯高街都有好多唔同食店,都係平價之選。本身想食嘅公仔記今日東主有喜,雖然可惜,但呢間大排檔麵店都相當有驚喜。

呢間陳記麵檔,沒有氣派裝修,其實只係坐喺街邊;沒有招待服務,其實只係店主夫婦小本經營;沒有高質食材,其實都係用上新鮮嘅食材。

麵店嘅食物選擇都好多,可以單拼或雙拼。

鮮牛柏葉配雞翼麵
細心用上黑柏葉,夠晒健康,而鮮牛柏葉輕輕一灼,時間掌握得啱啱好,新鮮夠爽脆!而滷水雞翼有兩大隻,好入味!至於麵底都夠多,無鹼水味。而最鍾意係佢個自家製辣椒油,夠辣又夠香。

陳記麵檔
地址:14公局市前地

平價推介:威記美食

一碗麵又點夠我哋食吖!所以行多幾步,嚟到旁邊嘅威記美食。

呢間威記美食,沒有氣派裝修,但至少有冷氣同卡位;沒有招待服務,但就有濃濃嘅人情味;沒有高質食材,但有用用心嘅烹調。

威記美食同一般茶餐廳無太大分別,但就有唔少葡式美食。

葡國雞飯
要數葡國菜最知名嘅菜式,又點少得葡國雞飯呢?葡國雞即叫即焗,夠晒熱辣辣,而葡汁香濃,餸飯一流!不過,雞嘅份量就唔算太多,大概有5件。

威記美食
地址:祐漢第一街55號興隆樓二座26號地舖
營業時間:星期一至星期日 07:00-22:00
電話:+853 2855 0668

中價推介:葡薏園

嚟到氹仔,我哋就揀咗間中價嘅餐廳,嚟到葡薏園!呢到嘅大廚安東尼奧係獲米芝蓮推薦餐廳嘅總廚,主打土生葡菜。葡薏園環境舒適,服務一流,好彩嘅仲有機會見到大廚出嚟同你打招呼架。

綜合小食拼盤
拼盤份量超多,幾個人share食都無問題!而當中,我哋最鍾意就係馬介休球!馬介休係鹽醃嘅鱈魚,所以本身咸咸地,而且炸得好香口,唔油膩,熱辣辣食仲可以有拉絲嘅效果,係必食之選。

炙燒葡式香腸
呢個香腸食落有啲似我哋嘅臘腸,食落鹹香十足,仲有焦薰味,好有層次。

葡式蕃茄濃湯配手工麵包
蕃茄濃湯夠晒香濃,酸酸甜甜好開胃,配上香口嘅手工麵包,用嚟配湯真係好正!

澳葡風味免治炒豬肉配白飯及煎蛋
A姐叫咗呢個澳葡風味免治炒豬肉配白飯及煎蛋,食之前整爛個蛋黃,先撈勻,再加上鹹香嘅免治炒豬肉,真係一流!

墨魚海鮮燉飯
呢個大大碟嘅墨魚海鮮燉飯有勁多海鮮,好抵食!

葡薏園
地址:澳門氹仔木鐸街 9 號
營業時間:星期一至星期日 12:00-04:00
電話:+853 2857 6626

Klook
Klook購買來回澳門船飛
網址:www.klook.com

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
報料或合作:keepintouch@aandmdiary.com

Leave a Reply

Your email address will not be published. Required fields are marked *