快閃舒適遊台北 北投大地酒店

好多香港人都鍾意趁weekend快閃台灣,我哋都係!以前後生啲仲會將行程排到密麻麻,其實仲攰過返工咁玩盡三日兩夜再返香港!但依家老喇,所以今次就揀間可以浸溫泉嘅酒店,等自己relax吓!今次嚟到台北北投,揀咗呢間五星級嘅大地酒店,輕鬆嘆吓,連A姐都大讚今次行程!所以邊個話快閃就一定會好攰架?快閃都可以好舒適!

舒泊夜宿
大地酒店分為5個房種,合共48間房:奇岩客房、楓林客房、雲集客房、丹凰套房、大地套房

奇岩客房
我哋今次入住奇岩客房,房間可揀一張Double Bed或兩張Single Bed,窗外睇到群山環繞嘅北投美景!

所有房間都包齊衛浴用品,而最令A姐心心眼就係佢嘅沖涼液、洗頭水、護鬆素同潤膚露仲係用上HERMES架!

所有房間附設私人風呂,可以隨時隨地享受浸溫泉嘅時光,A姐話浸多啲就會靚啲咁喎。

而所有房間都有免費Mini Bar,有 S.PELLECRINO 聖沛黎洛氣泡水、Fuji礦泉水、Twinings茶包、Nespresso膠囊咖啡、Treetop果汁、仲有手工餅乾、堅果、米果同新鮮水果等!浸完溫泉再飲番杯,食吓嘢都相當唔錯。

所有房間除咗有免費Wifi,仲有免費PAY TV(有好多電影選擇),連娛樂部份都照顧得好周到。

大地套房
全間酒店唯一一間嘅大地套房,平日一晚未連稅都要超過HK$12,000,我哋有幸參觀到示範單位,房間當然夠晒大,但最大賣點係邊浸溫泉可邊享受270度嘅關渡美景!

光陰部落藏書閣
每個人一踏入酒店,一定會被呢個四層高嘅書櫃所吸引!22行嘅書架,蒐羅世界各地嘅書籍多達五千幾本,好啱文青喺呢度打吓書釘,又或者如A姐嘅港女,都可以影到好多靚相。

大眾風呂
每日07:00-23:00可以免費使用,男女分區裸浸,溫泉區分為室內同戶外露天風呂兩部份。不過,我哋就未能影到相同大家分享喇。而最大賣點,係check out咗都可以繼續免費享用大眾風呂架!

活水區
每日07:00-23:00可以免費使用,一年四季嘅恆溫泳池同結合水療SPA池,記住戴泳帽同著泳衣先落得水架!部份日子仲有電影放映會,一家大細都可以享受時光。

半山健身房
喺台灣食得太多,做完運動又可以再食過!每日07:00-23:00都可以免費使用嘅半山健身房,設施都好齊全,有跑步機、滑步機、划船機、踏步機等。

The Gaia spa
如果對Spa有興趣,可以嚟到he Gaia spa,房客仲有優惠架!

喜歡廳
酒店有幾間餐廳,我哋check in後就嚟到西餐廳,嘆番個下午茶,享受我哋嘅時光。

 

而笫二朝嘅弟半自助早餐都喺嚟到喜歡廳。西式有蛋嘅選擇,而台式嘅可以揀粥或飯。而自助區同亦都提供沙律、粥、熱食同飲品,夠晒豐富。

奇岩一號
我哋今個旅程book咗一泊兩食,而今晚就約埋幾個台灣朋友嚟到奇岩一號。試吓呢度以新派川湘料理匯聚台灣在地食材,主廚堅持自製香料以提供最真實嘅調味!

我哋叫咗好多野食,而特別推介嘅有稻香大地牛同天府冒鴨鍋。

稻香大地牛
呢個稻香大地牛絕對係奇岩一號嘅必點菜式,以帶骨美國牛小排製作,份量十足,而肉質超鮮嫩,牛味香濃,店員細心提醒,先試咗原味,再加醬汁,真係好好味!

天府冒鴨鍋
選擇鴨齡較低嘅鴨,酥炸過後就放入冒菜鍋裡,望住個紅油湯頭,其實又唔算好辣,而鴨肉口感多汁,索晒辣嘅香味,最後仲可以加入寬粉添。

月兒彎彎涮涮鍋
第二日Check out後,我哋嚟到月兒彎彎食涮涮鍋,套餐包每人一碟美國頂級雪花牛或活菌松板豬,仲有前菜、綜合蔬菜盤、手工花枝滑,最後仲可以揀烏冬或黃金粥!值得一提,係個手工花枝滑,花枝份量超多,只感一流!

交通資訊
酒店提供免費接駁車往返北投捷運站或新北投捷運站。而其實由酒店行去新北投捷運站亦只需8分鐘,附近亦有齊超市、便利店、藥妝店同餐廳,尚算方便。

景點
酒店附近已有唔少景點,好似係北投圖書館、北投公園、地熱谷、凱達格蘭文化館同普濟寺等,酒店提供唔同嘅觀光景點旅遊路線,由嚮導帶大家去到參觀,有時間嘅不坊參加。

北投溫泉博物館
日佔時期就出現嘅溫泉公共浴場,依家就變成北投溫泉博物館。建築物富日式同羅馬風格,1樓就有羅馬拱柱環繞浴池,而2樓就係和室格局、日式地板,加上唔同嘅展品介紹,係認識北投同溫泉歷史及發展嘅好地方。

法鼓山農禪寺
台灣不嬲都多佛廟,而今次我哋就嚟到法鼓山農禪寺。一嚟到就一定會俾個水月池所吸引,倒影住大殿,真係估唔到大殿都可以咁現代化!而據說當初聖嚴法師送贈建築師「空中花,水中月」六個字,比喻人生如同空中花、水中月的虛幻,而取名為「水月道場」,但要留意室內喺唔影得相,背心短褲同拖鞋都唔入得場架,想嚟嘅朋友就要留意喇。而法鼓山農禪寺係佛門清靜地,大家都留意聲量呀。而另一重點就係金剛經牆,好壯觀!而法鼓山農禪寺顏色方面比較簡約,擺脫一向傳統屋頂搭配中式雕欄嘅風格,等大家可以沉澱心靈。

大地酒店 The Gaia Hotel
地址:11242 台北市北投區奇岩路一號
網址:www.thegaiahotel.com

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
報料或合作:keepintouch@aandmdiary.com

Leave a Reply

Your email address will not be published. Required fields are marked *