感受不一樣的……澳門 – 由中式傳統木雕到葡式精緻美食

第三集嘅《感受不一樣的……澳門》系列又嚟喇!今集我同M佬就帶大家去到氹仔睇唐重先生嘅木雕展覽:「生生不息」,再去到葡意園食個葡國餐啦!(M佬:你當自己係黃翠如咩?)其實,我哋諗住去食葡國菜,所以就去轉澳門啦!(M佬:咁想食滷肉飯,係未就要飛轉台灣呀?)……A姐:你咁叻,你寫啦!

好啦!咁就等我M佬講出事實嘅真相啦!因為嚟到暑假旅遊旺季,坐飛機嘅價錢大大提升,想暑假都出去玩返轉,澳門可能都係一個唔錯嘅選擇。我同A姐出發喇!

第一站去到氹仔舊城區藝術空間,今期嘅展覽係由澳門著名藝術家唐重先生用咗3年時間,由研究並利用膠合板技術,再用4-6個月時間雕製而成。

唐重先生擅長創作自然形態嘅木雕,而且鍾意將展品糅合社會文化同生活形態!

每個雕刻功夫都好細緻,真係巧奪天工呀。

咦!仲好好彩畀我見到唐重先生喎。

聽唐先生講,呢度嘅7件作品佢都好鍾意,一定要揀一個嘅話,可能就係呢舊雲喇!因為佢覺得人同雲係好似,因為人其實好似雲一樣都係空虛嘅。

另外,今次嘅製作用上嘅都係舊木材,利用黏合及膠合板技術,將材料重生,所以主題就係「生生不息」。

除咗有7 件融合膠合板技術嘅雕塑仲有唐重先生嘅手稿。

不過,中式嘅傳統未必適合A姐,所以參觀完木雕展覽就去食晚飯啦!今次去到由米芝蓮星級名廚Antonio Coelho設計菜單嘅餐廳 – 葡薏園。

餐廳嘅外觀係一間葡式小屋,而店內嘅設計都圍繞伊比利亞半島,好似真係去咗轉西葡呀!

雞肉批(Chicken Meat Pies)

港式嘅雞批入面有好多忌廉汁,葡式就相反,批嘅涵以厚厚嘅雞肉為主,所以食完都唔會滯,而且成個批都係由酥皮製成,所以咬落好鬆脆,夠晒香口!

橄欖油花蛤(Sauteed Clams in Olive Oil)

花蛤配上橄欖油、白酒、檸檬汁、香蒜、芫荽等香料製作,更加帶出花蛤嘅清甜鮮味!

蒜香炸蝦(Fried Garlic Prawns)

配上辣椒粉及炸蒜嘅海蝦,好彈牙又入味,廚師仲要好細心先把蝦殼除去,啱晒A姐呢啲懶人喇!

清蒸海鱸魚柳(Fresh Steamed Seabass Fillets)

用紙包住嚟蒸嘅鱸魚,鮮味十足,肉質滑溜,不過,怕骨嘅人就要小心食喇。

烤乳豬(Roasted Suckling Pig)

港式嘅燒乳豬就食得多,但葡式嘅製作方法就有少少唔同喇,用上烤嘅方法,所以乳豬無咁燶,但外皮都一樣香脆,而烤比燒嘅乳豬肉質更加鮮嫩!而最大驚喜在於自家製嘅薯片,薯仔味好濃㗎!

唐重木雕展覽:「生生不息」
地址:氹仔舊城區藝術空間(澳門氹仔木鐸街10號)
營業時間:7月5日至9月6日 12:00-20:00〔逢星期二至星期日〕

葡薏園
地址:澳門氹仔木鐸街 9 號
營業時間:星期一至星期日 12:00-04:00
電話:+853 2857 6626

Klook
Klook購買來回澳門船飛

Klook.com


網址:www.klook.com

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *