期間限定 全球十大必睇展覽 深圳teamLab

深圳?諗起羅湖過關咁多人,已經嚇死A姐喇,所以我哋都有N年無去過。不過,連續兩年被意大利《Designboom》評選為全球 10 大必睇嘅藝術展teamLab,先後喺日本、美國、韓國、印尼、加拿大、新加坡、台灣等地舉辦展覽,而由依家至11月30日,嚟到深圳展出,名為《舞動藝術展&未來遊樂園》,仲係teamLab有史以嚟場館面積最大、作品最多嘅一次展覽!鍾意玩嘅我哋,一於上去玩番轉啦。

由落馬洲港鐵站過關,大概坐30分鐘深圳地鐵到深圳灣公園站落車,由E出口經歡樂海岸行5分鐘,就會見到呢隻蛋蛋,就係展區所在地喇!

要留意,展區門口只接受支付寶或信用卡購票 (要留意信用卡外地簽賬或有手續費,請向發卡銀行查詢),我哋就提早上Klook買飛,夠晒方便。

呼應燈森林

成個展覽入面,我同A姐最鍾意就係一入場嘅呢個展品,燈同燈之間會互相傳遞顏色,橙色、藍色、白色、綠色、紅色等等,因應唔同嘅顏色加上鏡嘅反射,感覺就好似置身無窮無盡嘅世界一樣,真係好靚㗎!

光球管弦樂團

另外一個好吸引嘅展品就係光球管弦樂團,只要用手拍打呢啲波,就會發出唔同嘅聲音同變成不同嘅顏色。

被追逐的八咫鳥

入到去呢間小房間,追隨住八咫鳥嘅光影,唔識形容,好似同佢一齊轉嘅錯覺,玩完好似有小小暈添。

花與人,不為所控卻能共生——度時如年

展品投射咗一年四季入面花嘅綻放同凋零,亦會根據觀賞者同作品之間嘅距離或觸碰而有所變化,絕對係一個影相熱點呀。

水晶宇宙

由數以萬計嘅燈,塑造咗一個宇宙空間,真係好壯觀㗎!不過,通道中唔可以逗留,加上當日呢個展區嘅管理員,不停大叫「文明觀賞」,令我哋對呢個展品未能細心欣賞。

除咗以上嘅展品,仲有水粒子的世界、冰冷的生命、彩繪水族館、彩繪城鎮、彩繪城鎮立體紙模型、小人兒所居住的桌子、遠古神靈故事、串聯吧!積木小鎮、天才跳房子,真係玩足2個鐘㗎。

不過,留意返場館內係不得折返,所以喺前往下一個展品時要諗清楚呀;另外,展區內唔可以食嘢、飲嘢同無洗手間㗎,記住搞掂晒先入場呀!

離開teamLab,就要去補充水份,近期中國大熱嘅飲品店必定係喜茶,曾經聽過有人排咗三、四個鐘就係為咗呢個芝士奶蓋!不過,今日喺歡樂海岸嘅分店人唔多,排咗10分鐘就有得試吓喇!

開合式嘅杯蓋,一打開就聞到超香濃嘅芝士味,芝士奶蓋佔成杯飲品三分一,好細致濃郁,而茶味亦層次豐富,夠晒解喝。

深圳teamLab藝術展
地址:深圳歡樂海岸創展中心(中國深圳市南山區白石路8號歡樂海岸)
時間:2017年11月30日前 – 10:00-22:00,最後入場時間為21:00
門票:成人(平日)- 人民幣199元、成人(周末,假期)- 人民幣229元;小童(120厘米以下)- 人民幣160元
網址:www.teamlab.art

Klook
Klook購買,成人(平日)- 222元、成人(周末,假期)- 257元;小童(120厘米以下)- 175元
網址:www.klook.com

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *