清邁感受最傳統的泰風味

曼谷、華欣、布吉大家都唔會陌生,去泰國機票平咗咁多,消費又低,真係分分鐘一年去幾次呀!今次嘅大假,我哋放棄去曼谷shopping、放棄陽光與海灘,去到泰國清邁,感受泰北傳統悠久嘅一面!

嚟到清邁,相比曼谷同布吉,當地人嘅英語水平相對較低,想向途人問路都有一定困難;加上交通嘅問題,想玩多啲嘅不如參加Local Tour啦!我哋就推薦用Klook,除咗選擇多,仲可以輸入優惠Code,享有額外HK$25折扣!我哋係出發前已經揀好行程,出發去睇靈光寺(白廟)、探訪長頸族同船遊金三角!

 

不過,去旅行有時真係早過返工,好似今朝6點就俾M佬嘈醒,話要起身出發喇,我仲想同夢中嘅oppa玩多一陣先起身呀!!好喇,隻眼都未爭開就去到酒店大堂集合(因為去邊境地區,記住帶埋護照呀),難得係M佬已經好似小學生去旅行咁happy喇!

7點半就有專車準時接我哋,喺車上訓多陣,充充電就去到第一站 — Maekhachan溫泉,由於溫泉區設於路邊,加上清邁好熱,所以都係浸吓腳仔就算,如果未食早餐,不妨買隻溫泉蛋試試,都唔錯架!


短暫停留後,就去到第二站嘅靈光寺(白廟),聽導遊講,白廟嘅建築係以天堂為主題,沿路入去白廟(天堂),您會見到有好多來自地獄嘅骷髏骨,以提醒世人要做好事。呢個建築物到依家仲未全部完成,不過已經獲得全世界第二靚嘅廟宇稱號。

睇完白廟就去拜訪長頸族,聽講長頸族嘅收入來源就係由族人所製作嘅飾品,所以我同M佬都買唔少紀念品,除咗可以留念,仲可以幫助佢哋改善生活,買嘢嘅同時又可以同佢哋傾吓計,同長頸族影相留念添。請問呀M佬先生,你唔好掛住同長頸妹妹傾計,可唔可以幫長頸婆婆影張相呢!

午餐後,就開始金三角行程,首站就去到寮國嘅木棉島。前往寮國無論BNO定特區都要提早簽証,但木棉島就可以即時做落地簽証(30฿),島上除咗行街買嘢,仲可以試吓寮國啤酒消消暑!

 

 

喺金三角又少點得遊船河呢,記得睇《門徒》個時,劉德華同吳彥祖就係呢度睇罌粟喇(諗起吳彥祖就心心眼喇)!聽導遊講,以前金三角盛產罌粟,再製造鴉片、海洛英售賣全球,不過,依家已經變成一個好靚嘅經濟特區。

 

行程最後一站會嚟到泰緬邊境城市 — 美塞,呢個城市同深圳差唔多,咩叫差唔多?就係買A貨喇!由於時間關系,行程唔會進入緬甸國境,睇完美塞,行程就正式完結。

 

夜晚返到清邁就想訓覺?點得呀!清邁有3個夜市,分別係長康夜市、週六夜市同週日夜市:長康夜市每日都開,但相對較貴,如果時間唔多可以放棄;週六夜市位於東南門(Chiang Mai Gate)外,而週日夜市位於古城區內,兩個夜市賣嘅野差唔多,價錢都係超抵,我哋終於買到爆gip呀!哈哈!

Klook
Klook購買金三角一天遊

Klook.com


網址:www.klook.com

(記住Like同Share畀朋友)


想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *