澳門高端印度菜 氹仔果阿之夜

去澳門食葡國菜,唔通個個都鍾意食葡國菜咩?我諗大家喺Google Map入面都bookmark咗好多葡國餐廳、水蟹粥、魚翅飯店等等,之但係次次去澳門,食嚟食去都係嗰幾間,飯堂咩?有無新意呀?今次我哋就介紹你哋試吓好味又傳統嘅印度菜,位於氹仔嘅果阿之夜!

樓高三層嘅果阿之夜,地下嗰層係酒吧,主打小食同雞尾酒。咦!個雞尾酒Menu成張尋寶圖咁嘅?原來係1498年葡萄牙航海家Vasco de Gama航海之旅嘅地圖,佢係歷史上第一位由歐洲航海到印度嘅探險家,而呢度嘅9種特調雞尾酒就係以佢去印度途經嘅9個航點命名。每款雞尾酒分別以一種香料、水果同烈酒製成,真係好有印度嘅風情呀。

Mombasa

以龍舌蘭酒加上西柚汁同西柚鹽而成,味道比較濃烈,但西柚味好出好開胃,作為餐前嘅選擇相當唔錯。

Cape Verde Islands

如果好似我A姐咁,飲少少都會面紅,咁呢杯就啱晒你。用朗姆酒配上椰子同菠蘿嘅鮮甜味道,真係好fruity架!

咖喱雞迷你漢堡 Chicken Tikka Slider

作為餐前小食,為今晚嘅辣熱一熱身。內裏嘅咖喱雞,唔算好辣,但就好入味,而且香料味好香濃,可唔可以要多幾個?

果阿式炒蜆 Goa Style Clams

用上好多唔同嘅香料,令呢個蜆食落好有層次,粒粒蜆都漲卜卜架,而最驚喜就係會加上芒果入饌,好清新好得意!

而3樓就係餐廳,主打印度傳統菜餚。望住成個氹仔舊城區嘅夜景嘆呢個印度餐,真係好有異國風情。

魚肉莫柯利 Fish Moilee

怕辣嘅朋友呢個入門級啱晒,味道以椰奶為主,再略帶微辣,而魚嘅份量雖然唔多,但就好鮮好滑。

烤雞馬薩拉 Chicken Tikka Masala

經過醃製嘅雞肉用上tandoor烤爐烤製,配以濃郁嘅蕃茄奶油醬汁,味道濃郁,係中級嘅辣程度,但呢個汁真係無得頂,可唔可以叫多個飯呀?

印度烤餅

除咗飯,食印度菜又點少得烤餅呢,索晒汁嘅烤餅真係無得頂呀!記住用手食更滋味呀!

果阿之夜 Goa Nights
地址:澳門氹仔告利雅施利華街118 號
營業時間:星期一至日 16:00-01:00
電話:+853 2856 7819

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *