A姐M佬小故事

hong-kong-blogger-food-lifestyle-A姐M佬-玩樂日記-aandmdiary

A姐,生於1987年(過多幾年就只會講80後),從事一份超緊張嘅文職工作,同好多人一樣有返工時間,冇收工時間,唔通做人只得黑白色嘅生活。為了尋找色彩,A姐放假最鐘意捐窿捐罅尋尋覓覓,由橫街窄巷到浮華大地都有我嘅足跡,放大假,就梗係去旅行啦!計我話,做人最緊要開心!但A姐其實都同一般女仔一樣鐘意扮靚靚化妝同煮吓嘢食,咁先可以留得住M佬麻!

M佬,80後獨仔一名,講求生活質素,鐘意喺屋企一邊聽jazz一邊飲whisky。由細到大,M佬都認為唔可以過死板嘅生活,要有專屬自己嘅人生,如果唔係,死咗咪好唔抵!直至那年嘅12月1日,識咗A姐,彷彿人生路上再唔係得一個人,一齊尋找人生樂趣。依家每日都好期待放工放假,可以同A姐周圍去,周圍玩,咁先可以留得住A姐麻!

hong-kong-blogger-food-lifestyle-foodie-跳出黑白的框框-尋找生活中的藍與綠」

A姐:M佬,你有無搞錯呀!又抄我張相同字放上Facebook!
M佬:(奸笑)係呀!
10分鐘後….
A姐:M佬,你有無搞錯呀!點解你嘅Like同comments多過我咁多架!
M佬:(奸笑+勝利手勢)係呀!
A姐:我下次嘅Like一定要多過你!

如是者,重覆又重覆咁,我哋嘅第一年拍拖生活就係不停食嘢,不停去玩,再寫post嚟鬥多Facebook Like(諗番起都覺得甜蜜但好無聊),而踏入我哋嘅第二年,我哋發現自己個Facebook有幾多Like都無用,不如將呢估力量化為開一個Page嘅能量!希望同大家晒吓我哋嘅閃卡…吖,唔係!係希望同大家分享,介紹我哋兩小口子平時拍拖食飯嘅好去處,星期六日去邊度拍拖好玩啦,甚至係電影嘅情感分享或者我哋嘅每一個足跡。

我哋好感謝大家細閱我哋每一個分享,同我哋一齊「跳出黑白的框框  尋找生活中的藍與綠」!

Leave a Reply

Your email address will not be published. Required fields are marked *