影評 —《創世魔劫:喪屍圍城》 The Girl with All the Gifts 不一樣的喪屍片

講真! 喪屍片真係周街都係,屍橫遍野! A姐就係咁㗎啦,又要驚又要睇。之前睇《The Walking Dead》同《屍殺列車》都係成程揞住耳仔,今次又話要睇《創世魔劫:喪屍圍城》 The Girl with All the Gifts,不過好彩佢肯睇,無Miss呢套正戲!

電影改編自M.R. Carey嘅同名小說,故事同全部喪屍片一樣,都係講述人類如何擊退喪屍 (不過今次佢地唔係叫Zombies,而係Hungries),表面上平平無奇,不過內裏有好多精心安排。


不一樣的開頭

開場頭20分鐘係一隻喪屍都見唔到,只有一批被軍方監控住嘅小朋友每日去上堂。成程喺度玩懸念,釣住你條癮。點解嘅軍人咁驚啲小朋友,要綁住曬啲頭同手腳? 佢哋做咩食蟲? 開頭呢個說故事技巧,絕對加分。

潘多拉的盒子 (Pandora’s box)

故事開頭,Miss Justineau講述潘多拉的盒子故事,絕對係刻意嘅安排,為成套戲做鋪墊。潘多拉的盒子係希臘神話,話說宙斯送潘多拉一個神秘盒子,但要求潘多拉唔可以打開。不過潘朵拉敵唔過好奇心,偷偷地將嗰盒打開,將好多不幸嘅事放咗出嚟,好彩仲有希望,令人類可以繼續生活。成套電影根本就係潘多拉的盒子。第一層意義係人類面對喪屍,仍然唔放棄,心存希望可以研究疫苗。第二層係好奇心重嘅主角Melanie就好似潘多拉,最後佢燒咗真菌樹,就好似潘多拉打開嗰盒子一樣,為世界帶來災難,甚至末日。

喪屍2.0

每一套喪屍片都會加入自己嘅元素,好似《屍殺列車》啲喪屍係怕黑。今次就勁啦,有同人一樣嘅喪屍。主角Melanie就係喪屍嘅2nd generation (係喪屍孕婦肚中嘅BB,而肚中嘅BB喺媽媽嗰肚度食咗佢媽媽而出世)。人類就係打算用第二代的基因製造疫苗,拯救世界。

喺逃出嘅過程中,人類發現真菌樹,而樹上嘅果實爆開,就令真菌可以空氣傳播,真正嘅世界沒日,同平時只係透過血液傳播更加恐怖。

結尾逆向思維

睇開TVB嘅朋友都慣咗要睇大團圓,《創世魔劫》就係一套另類嘅電影,令大家反思。點解人類最後一定可以研發疫苗,擊退喪屍? 點解Melanie一定要犧牲自己,拯救地球? 同你哋人類有親咩? 同樣地,當所有人都癲咗,淨返落嚟嘅「正常人」,在瘋人眼中,只係異類,睇你向邊個方向諗。

不過電影當然有啲解釋唔到嘅地方,中途搵到嘅狗同貓,點解仲生存到? 喪屍2.0當無晒人類同動物,仲食咩? 最後死淨種嘅Miss Justineau點樣喺密封嘅情況下有嘢食? 算啦,睇戲都係唔應該駁故。

創世魔劫:喪屍圍城 The Girl with All the Gifts
導演哥林麥卡菲 (Colm McCarthy)
演員珍瑪雅德頓 (Gemma Arterton )、格蓮高絲 (Glenn Close)、珊妮雅娜紐娃 (Sennia Nanua)、 派迪·康斯丁 (Paddy Considine)
片長1小時51分
級別IIB 級
語言英語 (中文字幕)
上映2.3.2017

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *