影評 —《人造天劫》Geostorm 又一災難鉅獻 失望的大團圓結局

真係好想同A姐講聲對唔住,自從我轉咗新工,我哋夜晚食完飯之後,我都要趕返屋企做嘢,連同你睇套戲都無時間。今日決定將公司嘢放埋一邊,同你拍吓拖睇場戲。不過,我哋都唔係睇愛情片,係睇災難片 -《人造天劫》。

其實故事相當簡單,踏入2019年,地球全球暖化加劇,因而產生唔同嘅天然災害,好彩有科學家發明咗一套精密嘅人造衛星,去控制全球嘅氣候,但係因為有人惡意加入電腦病毒,破壞人造衛星,令地球嘅天然災害更嚴重。喺處理問題時,更發現原來背後有一個更大嘅陰謀……

好看在於香港發生大爆炸

之前睇過好多災難片,發生嘅地點都離不開紐約、三藩市或者倫敦,亞洲最多都係得東京會發生災難,所以今次嘅災難情節嚟到香港,仲有吳彥祖嘅客串演出,令感覺更貼身,睇嘅時候會更加投入。

特技效果逼真

天災嘅特技拍得做得好迫真,除咗香港,仲有上海、孟買、里約熱內爐同杜拜等等,其中有啲城市因為去過,見到咁嘅災難場面真係好有真實感。

兄弟情與父女情

好欣賞導演除咗運用電腦特技去玩盡成套電影,更加欣賞劇本描繪嘅兄弟同父女情。雖然唔係好細緻,但亦唔會感覺到太婆媽,睇到尾段嘅兄弟分離,真係睇到人好心酸!

見好就應該收

故事嘅奸角出人意表嘅係佢唔係你,權力真係可以令人自相殘殺,尾段節奏相當緊張。而同時間喺太空基地拯救人類嘅主角,喺基地自爆嘅一刻,我真係睇到眼濕濕,但竟然都可以順利返回地球,學晒TVB嘅大團圓結局,我嘅眼淚真係浪費晒!所以我成日都話見好就應該收啦。

人造天劫 Geostorm
導演:Dean Devlin
演員:謝拉畢拿、占史杜哲斯、艾比康尼殊、吳彥祖、艾哈里斯、安迪加西亞
片長:1小時48分
級別:IIA 級
語言:英語 (中英文字幕)
上映:12.10.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *