影評 —《悍戰太平洋2:起義時空》Pacific Rim: Uprising 強國勢力滲入 打破傳統美國主義

所有男人都鍾意機械人,我家M佬都唔例外。見到《悍戰太平洋2:起義時空》Pacific Rim: Uprising 就話一定要睇,仲好Sweet咁同我講返上集有幾好睇。雖然我無咩興趣,見係你,就捨命陪君子。

故事承接上集,講述人類與怪獸(Kaiju)大戰後,享受十年嘅和平。Jake (約翰保也加 飾) 原本係極具潛質嘅機甲獵人駕駛員,父親同怪獸對決中陣亡,Jake無繼承父業,過住沉淪嘅生活。一次偷取退役機甲能源時,遇上15歲嘅Amara (佳莉絲柏妮 飾),因為操作未登記機甲,被逮捕入獄,更被徵召入伍。好景不常,怪獸再次侵襲,太平洋戰爭捲土重來。

強國勢力滲入 打破傳統美國主義
荷里活電影於亞洲取景屢見不鮮,不過《悍戰太平洋2:起義時空》嘅中國元素真係多得很。獵人駕駛員嘅訓練基地位於中國,場景充斥大量簡體字。心水清嘅朋友應該見到Jake打開雪櫃,只見青島啤酒係唯一有牌子嘅產品。另外,電影起用張晉同景甜中國演員,張晉擔任指揮角色,景甜係邵氏工業話事人,老外牛頓都要學普通話。最後能夠打敗怪獸,救出Jake同Amara,都係因為景甜,打破傳統英雄片嘅美國主義。空穴來風,未必無因,都係因為錢作怪。《悍戰太平洋》第一集導演Guillermo del Toro曾表明有意開拍續集,不過因為環球影業同傅奇影業出現糾紛,令續集無限期擱置。後來獲中國萬達影業注資,最終於2016年成功開機。

情節老正 意料之內
話明係機械人大戰片,劇情發展喺預料之內,都係怪獸出現,機械人戰勝,成功保衛地球。另外,唔難估牛頓係反派,佢喺屋企嗰一幕就呼之欲出,令故事缺乏驚喜。最後,結尾為第三集埋下嘅伏筆,講得得太白,一啲神秘感都無,令人失望。

人物描繪不足 性格平面無味
電影花大量筆墨交代情節,缺乏角色描寫,Jake同Amara嘅筆墨已經算多。學員戲份奇少,令故事角色平面。其中教官同學員之間只有兩三嘅交流,學員無啦啦就可以直接上陣殺敵,說服力不足。

悍戰太平洋2:起義時空 Pacific Rim: Uprising
導演:史蒂芬·S·迪奈特
演員:約翰·波耶加、史考特·伊斯威特、卡莉·史派妮、李維·米登、景甜、亞德莉婭·阿霍納
片長:1小時51分
級別:IIA 級
語言:英語 (中英文字幕)
上映:29.3.2018 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:Keepintouch@aandmdiary.com

Leave a Reply

Your email address will not be published. Required fields are marked *