影評 — 《拆彈專家》Shock Wave 超震撼炸紅隧大製作

邊個話港產片一定係爛片㗎?我哋A姐M佬梗係要支持香港製造啦!由劉德華監製兼主演嘅警匪動作片《拆彈專家》絕對係誠意之作。

《拆彈專家》講述身為爆炸品處理課高級督察嘅章在山 (劉德華 飾) ,於多年前混入火爆洪繼鵬 (姜武 飾) 嘅犯罪團隊做臥底,成功破獲爆炸劫案,拘捕火爆細佬,不過火爆走甩咗,揚言一定會返嚟報仇。相隔幾年之後,香港接二連三發生炸彈案,火爆更堵塞香港最繁忙嘅紅磡海底隧道,脅持數百人質,展開匪徒同警方嘅角力。

製作認真,美指功勞甚大

《拆彈專家》投資高達七億元,一開場嘅打劫追逐戰,大大小小嘅震撼爆破場面,製作認真,超強嘅現場感。最誇張係電影團隊用咗兩個月嘅時間搭咗像真度極高嘅「紅磡海底隧道」,就連紅隧Office天橋都有,真係好似喺真紅隧拍咁,讓觀眾置身現場,親歷其景,令成套戲好有質感!

緊張到手心冒汗

電影一開頭就已經無悶場,闖入金庫,驚匪追逐,節奏明快,雖然未去到好緊張,不過已經有少少透唔到氣嘅感覺。另外,爆炸往往只係發生喺幾秒間,電影極力描寫拆彈嘅過程,Focus喺引信就快爆嗰一刻,轉入去嗰引信會唔會啟動嗰炸彈呢? 究竟剪邊條線呢?電影成功帶動觀眾緊張嘅情緒,真係睇到人哋捉緊拳頭,呢啲就係所謂嘅劇力逼人!

生命保護生命

章在山絕對係《拆彈專家》中嘅英雄,就係嗰隻毋懼危險將響鈴掛喺貓頸上嘅老鼠。每一次遇到炸彈嘅時候,佢都係為大局著想,無一絲猶疑。另外,蔡瀚億BabyJohn喺人質堆中,被匪徒發現係休班警員,身上被綁住炸藥。最後喺無法拆彈之下,佢既無助,亦因為自己係警察而決定犧牲,遠離人群同車輛。嗰一幕真係睇到心痛,睇到眼濕濕。

拆彈專家 Shock Wave
導演:邱禮濤
演員:劉德華、姜武、姜皓文、吳卓羲、宋佳、蔡瀚億BabyJohn、張繼聰、黃日華
片長:1小時58分
級別:IIB 級
語言:粵語 (中英文字幕)
上映:20.4.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *