影評 —《搶錢耆兵》Going in Style 朋友唔洗多,有幾個交心嘅知己就夠啦!

A姐:唔知我哋70歲嗰陣會點呢?
M佬:我想同你環遊世界,享受埋餘下落嚟嘅日子……
A姐:口甜舌滑……
M佬:不過我好肯定我一定唔會去打劫銀行!

《搶錢耆兵》Going in Style 陣容強大,有Morgan Freeman(摩根費曼)、Michael Caine(米高堅)同Alan Arkin(艾倫雅堅)三大金像獎巨星,睇佢哋三個都抵晒!《搶錢耆兵》講述三個老友記Willie、Joe同Al過去為公司賣命,點知退休金被人凍結,加上Joe嘅屋企又被銀行收回,決定挺而走險,打劫銀行。

「照顧長者是我們的責任」

第二次世界大戰後,人口激增,出現Baby Boomers,人口老化正正係好多國家嘅問題。電影以輕鬆搞笑嘅方式交代老年人缺乏退休保障嘅問題,以三個老友記決定打劫銀行反諷政府保障唔到佢哋。打劫銀行當然係一個好天馬行空嘅行為,不過就係因為佢夠天馬行空先有戲劇性。

你的日子如何,你的退休生活也必如何

三個老友記因為無咗退休金,要淪落到食4蚊美金地下餐廳自助餐,又無得食自己鍾意食嘅Pie。一路睇,一路不禁想像自己嘅退休生活會點。全民退休保障講咗咁耐,唯一為退休嘅MPF又唔生性,後生真係要未雨綢繆,計劃好退休生活(好似突然喺度Sell緊Financial Planning咁)!

就讓我們一起老下去

我M佬成日都話:「朋友唔洗多,有幾個交心嘅知己就夠啦!」

人愈大,朋友就愈似手中嘅沙,想努力抓緊,總係會慢慢流走,有的結婚生仔,有的忙於工作。電影中嘅三位老記絕對體現咗咩叫友誼永固,朋友話要去打劫銀行,就兩肋插刀;朋友要換腎,即刻捐畀佢。人生中搵到幾個交心嘅,陪你走到最後嘅知己,真係此生無撼。

搶錢耆兵 Going in Style
導演:Zach Braff(扎克布拉夫)
演員:Morgan Freeman(摩根費曼), Michael Caine(米高堅), Alan Arkin(艾倫雅堅)
片長:1小時36分
級別:IIB 級
語言:英語 (中英文字幕)
上映:4.5.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *