影評 —《春嬌救志明》Love off the Cuff 究竟係邊個救邊個?

A姐: 如果我同M媽一齊跌落海,你會救邊個先?
(M佬心諗: 唔係呀嘛,仲問啲咁嘅問題……)
A姐: 快啲答呀!
M佬: E…..你睇下嗰邊……

嘩!好彩我家女人好易哄,乜女人咁鍾意問埋呢啲問題,答咩都死。今次《春嬌救志明》都係玩嗰「救」字,問你死未?電影承接2010年嘅《志明與春嬌》同2012年嘅《春嬌與志明》,今次去到2017年,余春嬌已經係40歲中女,張志明亦都36歲,呢個愛情故事仲可以點繼續落去呢?

「救」,究竟係邊個救邊個?

電影名中嘅「救」字,絕對有點題作用,用得好好。

第一,電影名係語法上構成一個基本句子:

春嬌 (主語) 救(謂語) 志明 (賓語)

意思係余春嬌於感情上拯救咗張志明,令張志明成長,成為真男人。

第二,心水清嘅觀眾都會發現,今次余春嬌同張志明就係因為「救」定「唔救」而吵架,仲差啲分手,係故事起承轉合嘅重要衝突。

第三,向另一個方面諗,余春嬌作為40歲嘅中女,有張志明呢個伴侶,唔知算唔算係另一個層面嘅救贖呢?

原來余春嬌都係一名「港女」

之前兩集,我好鍾意余春嬌呢個角色,鍾意佢嘅爽朗,佢嘅樂天,不過今集令我覺得佢原來 都!係!一!名!港!女!

地震發生,志明即刻(係即刻)由客廳衝去廁所,叫春嬌走去枱底,呢個絕對係求生常識。張志明又勸又拉,係余春嬌自己死都唔走。點解余春嬌可以話張志明只係諗自己?其實佢一樣係咁自私,佢自己太驚唔走去枱底,點解要期望人哋要陪你一齊死,究竟係咩心態?仲要人哋喺有努力救你,只係你唔領情咋喎。故事交代春嬌係因為爸爸嘅陰影,對男人同愛情無信心,都補哋到飛。一句講晒,港女上身。

男女大不同

電影喺「救」定「唔救」呢個話題上絕對反映出男人同女人嘅分別,女人感性,男人理性。春嬌認為志明只顧自己,喺危險關頭竟然拋低自己,佢覺得男人應該係要保護女人。不過志明就話佢無拋低春嬌(講真佢真係無),佢係去拉枱咋。志明好明顯係理性出發,遇到危險梗係要保護生命。

互相呼應

如果大家有細心留意,唔難發現今集有好多呼應先前兩集嘅位置。

第一,一開始嘅 n 55!W ! 就係呼應第二集《春嬌與志明》嘅結尾。

第二,《春嬌救志明》貫徹咗導演彭浩翔春嬌志明式嘅開場白,就係講驚悚懸疑故仔!繼之前嘅劏豬凳同停車場故仔,今次就係趷趷剛食人怪!大家唔洗擔心自己入錯戲院呀。

第三,大家有無覺得余春嬌整嗰本台北旅遊書好誇張,又立體又剪剪貼貼? 如果呢件事發生A姐身上就一定係撞邪。大家仲記唔記得第一集余春嬌嗰本特製外賣簿呢?即刻覺得非常合理,切合人物性格。

最後,大家知道嗎?喺危險嘅時候,心裡第一個閃現嘅人,就係你嘅「對的人」。A姐,你見到我嗎?

春嬌救志明 Love off the Cuff
導演:彭浩翔
演員:楊千嬅、余文樂、蔣夢婕
片長:2小時
級別:IIB 級
語言:粵語 (中英文字幕)
上映:27.4.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

 

Leave a Reply

Your email address will not be published. Required fields are marked *