影評 — 《波士BB》The Boss Baby 搞笑加感動

M佬: 第日我哋生一仔一女,男仔叫穎富,女仔叫穎依,你話好唔好?
A姐: 生一個夠啦!
M佬: 吓……點解呀?生多個啦,獨生好孤獨,好慘㗎! 我就係一個活生生嘅例子。
A姐: 不過當細嗰個出世,大嗰個一定會呷醋,就好似我細佬出世嗰陣,就搶晒爸爸媽媽啲愛。

各位有細佬妹嘅朋友,係唔係都曾經覺得佢哋同你爭寵,分薄咗父母對你嘅愛?電影《波士BB》就係改編自Marla Frazee嘅繪本《My Boss Baby》,從原本係獨生子嘅Tim角度出發,講述屋企多咗個BB,令生活大變。而且呢個BB仲唔係正常BB,來自BB集團,識講人話,背後仲有任務在身。

豐富想像增強故事張力
動畫無場景拍攝限制,往往可以天馬行空,《波士BB》絕對發揮得淋漓盡致。電影一開始就用Tim仔第一人稱敘事,好聰明咁將Tim仔設定為一個想像豐富嘅小朋友,一時喺剛果,下一秒就已經落咗水底,令電影之後誇張嘅情節合理化,例如: 後花園大戰同房間變監獄等,成功令故事更有娛樂性同張力。

BB大晒

電影描寫BB西裝骨骨,眼神衰衰,成個波士,爸爸媽媽就好似佢下屬,24小時候命。講真,雖然電影嘅表達有啲誇張,不過都幾貼近現實吖,BB一喊,父母總會用盡辦法氹佢,真係大晒。不過大晒都唔係最恐怖,最恐怖係當Tim仔發現波士BB識講嘢,波士BB話要搶晒父母嘅愛,真係令人好心寒。

又搞笑又感動

睇完預告,再加埋《荒失失奇兵》導演主理,覺得《波士BB》一定係笑足全場。點知笑位無想像咁多,最好笑係男扮女裝媬母追捕BB嗰一幕。去到故事後部分,調子有所不同,Tim仔同波士BB因為經歷多咗,日久生情,Tim仔更話自己雖然未讀過商學院,不過如果父母嘅愛唔夠佢哋分,佢願意將所有愛畀晒細佬,的確係有少少感動,不過又未去到會喊,可以再煸情啲。

真亦假時假亦真

去到電影最後,大家會發現原來之前所講嘅一切都係Tim仔同自己嗰大女講嘅故仔,教定佢點樣迎接細妹。大女問Tim仔頭先嗰故事係唔係真㗎嗎?Tim仔話自己記得真係咁。之後就出現一個著住西裝嘅男人,好似波士BB咁無故丟錢。究竟嗰故仔係Tim仔嘅狂想定真有其事呢?

波士BB The Boss Baby
導演:湯麥加夫 (Thomas McGrath)
聲演:阿Bob (林盛斌) – 粵語聲演;艾力寶雲 (Alec Baldwin) – 英語聲演
片長:1小時37分
級別:I 級
語言:粵語 (中文字幕)
上映:13.4.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *