影評 — 《烈焰雄心》 Only The Brave 究竟是實而不華,還是主次不分?

大家決定去睇咩戲之前,會唔會睇下影評先?我哋就係見到《烈焰雄心》大獲好評,決定買飛睇。睇之前都已經預咗唔係傳統荷李活災難片,係淡淡然嘅人物傳記,不過睇完都係覺得差咗少少嘢,可以做得更好。

電影改編自真人真事,講述2013年美國亞利桑那州中部嘅山火事件,來自「花崗岩山消防精英隊」(Granite Mountain Hotshots) 嘅19名消防隊員,在撲救行動中,因火勢突然加速蔓延,最終殉職而亡。

實而不華還是主次不分?

明白電影係人物傳記,大家都大讚電影唔係傳統荷李活災難片,欣賞導演平實地展現「花崗岩山消防精英隊」嘅英勇。講得好聽啲,呢啲叫實而不華,不過大家有無覺得故事嘅敘述有啲流水漲,平鋪直敘。

如果要平實咁展現「花崗岩山消防精英隊」嘅英勇,點解唔拍紀錄片?既然選擇用電影,就應該有起承轉合,不過成套戲都搵唔到高潮。

電影花大量篇幅描述訓練過程,當中亦加插零星山火事件。以文學術語嚟講,呢啲叫做伏筆鋪墊,不過導演會唔會鋪得太多呢?亞利桑那州中部山火事件理應係電影嘅高潮,不過相對而言,著墨並唔多,有少少主次不分,剪裁不當。

平實表達只屬風格調子,與剪裁鋪排風馬牛不相及,不可混為一談。

浪子回頭

布蘭登係「花崗岩山消防精英隊」嘅唯一幸存者。一開頭佢又吸毒,又有案底,仲搞大人哋嗰肚,絕對係一個典型嘅衰人。佢為咗啱啱出世嘅女兒,突然生性決定做加入「花崗岩山消防精英隊」。一個衰人決定從良並不容易,不過要有人肯定同畀機會就更難,欣賞馬爾許相信布蘭登,畀佢加入。

消防員英勇

電影明顯係唱頌「花崗岩山消防精英隊」嘅英勇同使明感,盡自己所能停止山火。意外發生後,家屬抱頭痛哭,喺體育館等候消息,希望唯一幸存者係自己老公,真係如此嘅殘忍。雖然未去到喊,不過心有戚戚然。

烈焰雄心 Only The Brave
導演:約瑟高辛斯基
演員:佐斯布連、米爾斯泰勒、謝夫布烈治、占美斯巴治戴爾、泰勒基斯查、珍妮花康納莉
片長:2小時13分
級別:IIA 級
語言:英語 (中英文字幕)
上映:19.10.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:Keepintouch@aandmdiary.com

Leave a Reply

Your email address will not be published. Required fields are marked *