影評 — 《獵殺星期一》What Happened to Monday 恐怖政治謊言

睇戲真係睇開有條癮,加上星期日打風無嘢做,最啱落樓下商場戲院睇戲。今次揀咗由歐蜜瑞佩斯Noomi Rapace一人分飾七角嘅《獵殺星期一》What Happened to Monday。全劇兩個鐘,毫無悶場,劇力迫人。

故事講述2073年,全球人口過剩,糧食不足,飢荒肆虐。科學家研發出可以大量生產嘅基因改造食物,不過會大大提高雙胞胎嘅機率,反而令人口暴增。於是出現「一孩政策」,政府搜捕超生子女,送去冷凍,聲稱等到人口穩定,可解凍重生。外公泰倫為咗保住7胞胎姊妹,挺而走險,以Monday至Sunday命名7姊妹,而佢哋會按住自己嘅名,每星期有一日離開屋企,以凱倫塞文Karen Settman嘅身份生活一天。一切都非常順利,不過30年後嘅某個星期一,Monday突然無返屋企……

單刀直入 鋪墊得宜

開頭以簡單旁白,直接道出故事嘅設定,毫無廢話,乾淨俐落,很快就點出Monday失蹤的中心懸念,故事不斷推展。

聰明嘅觀眾應該不難發現故事伏筆處處,解構點解Monday會背叛姊妹。

第一,喺「一孩政策」下,7姊妹當中邊個應該會存活落嚟?咁梗係Monday啦,原本佢可以堂堂正正咁以Karen Settman嘅身份生活,點解佢要同另外6姊妹分享,過住嘅偷偷摸摸嘅生活?

第二,電影刻意補敘Thursday唔守規矩,出去玩滑板,受傷無咗半隻無名指,連累另外6個都要切咗半隻手指 (好似以前中國嘅連坐法)。Monday一向安守規矩,做好大家姐嘅本份,自然心有不甘。

第三,故事推展落去發現Monday愛上Adrian,仲有埋BB。試諗下,如果Monday繼續要同另外6姊妹分享Karen Settman嘅身份,佢係無可能同Adrian一齊。而Monday就為咗令呢兩個BB生存落嚟,就同妮可開曼Cayman簽約,不過就要令另外6姊妹死,令自己能夠成為唯一嘅Karen Settman。

一人分飾七角

電影一大亮點係主角歐蜜瑞佩斯一人分飾七角,每人個性截然不同。開場無耐,見到7姊妹坐喺同一張枱嗰陣,真係服咗歐蜜瑞佩斯,演到人都癲。

A姐話覺得電影描寫7姊妹嘅性格唔夠鮮明,講真電影得兩個鐘,有幾多時間可以塑造7姊妹嘅性格吖,平均除返,每人得17分鐘時間。我反而覺得導演同編劇能夠喺緊絀時間,巧用外表裝扮同每人面對追捕嘅反應,塑造出7姊妹不同嘅性格,已經可見其功力。

恐怖政治謊言

電影嘅一大奸角Cayman主張「一孩政策」,揚言為咗人類美好嘅將來,搜捕超生子女,透過冷凍技術,把小朋友保存落嚟,等到人口穩定,就可以解凍重生。點知原來全部都係大話,根本就無冷凍過,只係將佢哋燒死。反觀現今社會,好多政客表面上將政策包裝很冠冕堂皇,究竟有幾多個係大話?可能我哋只係一直蒙在鼓裡。

獵殺星期一 What Happened to Monday
導演:湯米維高拉
演員:歐蜜瑞佩斯、露美慧柏絲、威廉迪福
片長:2小時3分
級別:IIB 級
語言:英語 (中英文字幕)
上映:12.10.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:Keepintouch@aandmdiary.com

Leave a Reply

Your email address will not be published. Required fields are marked *