影評 —《瘋人院逐個捉》 偽紀錄片式拍攝手法 令觀眾親歷其景

韓國驚慄片《瘋人院逐個捉》Gonjiam: Haunted Asylum 喺韓國上映,個個都話驚,有觀眾嚇到倒瀉爆谷,又話要帶眼罩睇先得。有無咁嚇人呀?就等我哋A姐M佬去驗證一下。

電影取材於曾被CNN票選為世界上七大毛骨悚然禁地之一嘅韓國昆池岩精神病院,相傳精神病院底下埋葬好多士兵,其後建立精神院,不過病人陸續離奇死亡,傳聞係院長同醫生虐待同殺害病人,最後昆池岩精神病院於90年代關閉。網絡節目「Horror Time」招募一眾大膽人士前往昆池岩參精神病院探險直播。為咗直播點擊率,主持人暗中設下陷阱,點知後期真係撞鬼,嚇到標尿。

真實地點兼偽紀錄片式拍攝手法 親歷其景
恐怖片恐怖之處在於真人真事,所以好多著名嘅驚慄片都係標榜真人真事,令觀眾更加投入。雖然《瘋人院逐個捉》唔係真人真事,不過就選擇真實存在嘅昆池岩精神病院--曾被CNN票選為世界上七大毛骨悚然禁地之一,即刻覺得件事好真實。另外,電影以偽紀錄片式嘅拍攝手法,用第一身拍攝,跟住主角嘅視點,佢見到乜,你就見到乜,令觀眾親歷其景;加埋網上直播成份,大玩疾機同剪接效果大大增加電影嘅臨場感。

開首枝節橫生 後部步入佳景
電影前部分嘅鋪排過長,玩水上活動更係毫無關係,有拖時間之嫌。在昆池岩精神病院嘅前半段都是虛張聲勢,略嫌有少少悶場。直到其中一個主角伸手入櫃開始,為全劇轉捩點,氣氛突變。電影善用光暗、環境、儀器同聲效營造氣氛,令觀眾不寒而慄。

402室打大佬 大玩懸念
電影由頭到尾不斷渲染402室有幾恐怖,無人能夠打開到。呢個懸念支撐整套電影,最終電影嘅主角用不同方式入房,怪事同惡靈嘅出現唔算恐怖,不過主角嘅無助,令人頭皮發麻,不寒而慄。

瘋人院逐個捉 Gonjiam: Haunted Asylum
導演 :鄭凡植
演員 :魏河俊、朴智賢、吳雅妍、文藝媛、朴成勳、劉在允
片長 :1小時34分
級別 :IIB
語言 :韓語 (中英文字幕)
上映 : 19.4.2018 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *