影評 —《訪 • 嚇》Get Out 驚悚手法展現種族問題

A姐:嗰預告好似好恐怖呀!
M佬:邊到恐怖姐……
A姐:你睇下嗰工人姐姐嗰樣,好驚呀!我唔睇呀!
M佬:咁好啦!

就係因為咁,所以我M佬就一支公買飛入場睇啦! 仲要係我成世仔第一次自己一個人去睇戲,我嘅第一個就咁畀咗《訪 • 嚇》Get Out……

《訪 • 嚇》Get Out講述黑人攝影師Chris同白人女朋友Rose拍咗拖幾個月,而Rose就決定週末帶Chris返紐約郊外嘅屋企見家長。不過當Chris到達Rose屋企,怪事接二連三發生,似乎事有蹺蹊,令故事更懸疑。

好看在於說故事的技巧
講真《訪 • 嚇》嘅故事唔係超級特別,電影開門見山,話畀觀眾聽呢個係一個關於黑人失蹤嘅故事。不過好睇就在於說故事嘅技巧,成功吊住大家條癮,睇到最後先知道背後嘅陰謀。成日都聽人講:掩住耳仔睇鬼片就唔驚,所以音樂絕對係驚悚片嘅一大重點。《訪 • 嚇》成功運用配樂同音效,牽動觀眾情緒。相信好多觀眾都會喺Chris深夜在走廊見到人影嗰一幕被嚇一跳,絕對係音效嘅功勞。另外,電影加插不少演員表情嘅特寫,佢哋嘅表情令人睇到心寒。

埋下伏筆 製造懸念
真心欣賞導演同編劇嘅安排,電影伏筆多不勝數,前後呼應,增強電影嘅可觀性。
1. 白人女友Rose唔畀警察睇Chris嘅身份證係因為佢唔想警察知Chris係同佢一齊,暗示Rose係有奸計。
2. 當Chris望住被撞傷嘅鹿,貌似心有戚戚然,原來係因為同阿媽以前嘅車禍有關。而Chris內疚當年無及時救阿媽,令佢喺電影結尾救工人姐合理化。
3. Rose爸爸向Chris介紹屋企嘅時候,提到Rose嘅爺爺係奧運跑手,呼應Chris晚上撞到爺爺練跑嘅情節,暗示嗰個黑人就係Rose嘅爺爺。
4. Chris喺白人Party因為閃光燈而激發起黑人醒覺,暗示佢係被人催眠,亦都呼應咗最後Chris利用閃光燈令爺爺醒覺。

以小見大 反映種族問題
電影以驚悚包裝,實為黑人作大平反,以小見大,反映美國社會嘅種族問題。明明係白人女友Rose揸車撞到鹿,白人警察都要求黑人Chris交出身份證。另外,白人口口聲聲話自己支持種族平等,不過又成日將膚色掛喺嘴邊 (如果奧巴馬競選第三屆總統,佢地一定會投佢),如果唔介意,就唔洗成日講啦!仲有,就連黑人自己都覺得自己嘅膚色係一個問題,例如,黑人Chris問白人女友有無同父母講自己係黑人,明顯自己本身都介意自己嘅膚色。

訪 • 嚇  Get Out
導演:佐敦比爾
演員:丹尼爾卡魯亞、艾莉遜威廉絲、畢利惠特福、嘉芙蓮堅娜
片長:1小時44分
級別:IIB 級
語言:英語 (中英文字幕)
上映:18.5.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *