影評 — 《逃出魔幻紀:叢林挑機》Jumanji: Welcome to the Jungle 推陳出新 緊張兼好笑

A姐: (望住張戲飛) 《逃出魔幻紀》呢個名咁熟嘅?
M佬:捉棋會成真嗰套電影呀!
A姐:我記得啦,啲猛獸昆蟲喺現實出現。
M佬:又幾好記性。

相隔22年,《逃出魔幻紀:叢林挑機》Jumanji: Welcome to the Jungle 以全新形象,驚喜回歸。講述4位中學生被罰留堂,喺打掃期間發現古老遊戲機,點知一玩就被吸入遊戲世界,化身為遊戲中嘅角色,展開一場瘋狂刺激嘅叢林歷險。開頭似乎幾好玩,不過想要回到現實世界,必須完成遊戲任務,打爆機先得。

舊酒新瓶 以電子遊戲機重新包裝

當年《逃出魔幻紀》大賣,就係成功將現實同遊戲世界結合,成為後期好多電影同故事嘅藍本。《逃出魔幻紀:叢林挑機》保留住呢個優良傳統,重新包裝。隨住時代變遷,仲有邊個玩Board game (雖然我哋仲好鍾意玩),順理成章今次改用電子遊戲機。第一集係玩家擲骰到相應格數,獅子、洪水、食人花等怪事就會係現實發生,今集就係直接將玩家由現實傳入到遊戲世界,一路睇就好似打緊機咁,代入感大大提高。

人物設定得宜

細心嘅人物設定絕對係電影嘅一大亮點。4位中學生只係同校同學,仲要係一啲都唔熟,呢個設定令佢哋嘅歷險更有張力,由互相指責,到慢慢建立默契,信任,友情,甚至愛情。另外,現實人物同遊戲角色嘅性格同性別反差,絕對係刻意安排,成功製造更多題材,加強衝突,令電影更為緊湊。

推陳出新 緊張兼好笑

好多人成日話續集一定無第一集咁好睇,不過我反而鍾意《逃出魔幻紀:叢林挑機》多過《逃出魔幻紀》。特別欣賞由棋盤變成電子遊戲嘅設定,令電影更有現代感。另外「打機過關」呢條橋絕對唔係新嘢,觀眾唔難估到結局,不過《逃出魔幻紀:叢林挑機》細心嘅人物設定,現實同虛擬世界嘅反差,令電影嘅可觀性提高。再者,電影笑料百出,要做搞笑得嚟又緊張真係唔易,節奏掌握得宜。

逃出魔幻紀:叢林挑機 Jumanji: Welcome to the Jungle
導演:積卡斯丹 (Jake Kasdan)
演員:狄維莊遜 (Dwayne Johnson),積伯克 (Jack Black),嘉倫招莉仁 (Karen Gillian),奇雲哈特 (Kevin Hart)
片長:1小時59分
級別:IIA 級
語言:英語/粵語 (中英文字幕)
上映:21.12.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:Keepintouch@aandmdiary.com

Leave a Reply

Your email address will not be published. Required fields are marked *