影評 — 《29+1》電影版 你想當林若君,還是黃天樂?

親愛的彭秀慧 Kearen Pang:

第一次睇你嘅演出係同三角關係合作嘅《二人餐》,鬧交嗰一幕仍然歷歷在目,慶幸我嘅酥皮盒子仲未變壞。之後再睇埋你嘅獨腳戲《Tiffany》同《29+1》,好鍾意你著婚紗慢步嘅一幕。恭喜你今次轉戰做導演同編劇,將自己嘅作品《29+1》搬上銀幕。

你的影迷 M佬

作為影迷嘅我就梗係拉埋A姐去睇《29+1》,啱晒就快29+1嘅A姐,希望佢睇完會有所領悟啦,哈! 電影講述兩個互不相識,性格大不同嘅女仔 —— 林若君(周秀娜 飾)同黃天樂(鄭欣宜 飾)—— 同樣就快「三字頭」,因為林若君要暫租黃天樂嘅家,令兩人隔空「相遇」。

舞台劇的影子

《29+1》,自2005年嘅首演,已經有過百場嘅演出,絕對係叫好又叫座嘅舞台劇。雖然今次故事用電影語言呈現喺大家眼前,不過都仍然有好多舞台劇嘅表達手法。例如林若君自我介紹嘅時候,為咗表達女性努力保養,電影選擇咗用一大班女性穿黑色背心搽面膜。另外,描寫林若君每日營營役役喺中環返工,周圍打工仔嘅排位,顏色Tone,好明顯係刻意安排,畫面真心靚。

30歲的迷惘

「30歲」呢個關口,真係咁可怕?等我訪問下A姐先 (衰佬,玩嘢呀你)。A姐,你唔洗講都知啦,見你睇到眼濕濕,好有共鳴呢?《29+1》咁受歡迎都係因為嗰種共鳴感,一針見血。唔著背心,要戴頸巾;唔飲凍嘢,飲紅棗水;唔食西多士,食梳打餅。女人去到30歲,真係咁差?其實30歲呢個土星周期點都會嚟,只係在乎你點樣面對。

得到全世界又如何

林若君,29歲,Regional Marketing Director,職場得意,有一個拍咗10年拖嘅男朋友,表面一切好美好。呢個似乎係好多香港人追求嘅目標,力爭上游,好似係你同我。不過當你得到全世界,企喺高峰嘅時候,你又知唔知自己為咗咩咁努力呢? 面對呢個樽頸,難免有啲迷失。

黃天樂,29歲,10年都係喺唱片舖打工,對好多人嚟講,大家會覺得佢無出色。不過有邊個可以好似黃天樂咁豁達,樂天知命,唔理世俗人嘅標準。唔一定要向上爬,活得快樂就Okay啦。

特別鍾意林若君同老闆Elaine (金燕玲 飾) 請辭嘅對話,人生係為咗咩?當人作出選擇,就必定有代價。當你選擇咗邊條路,就要奮不顧身努力行。

如果有得揀,你想做林若君定黃天樂?

29+1
導演:彭秀慧
演員:周秀娜、鄭欣宜、蔡瀚億(BabyJohn)、楊尚斌
片長:1小時51分
級別:TBC
語言:英語 (中文字幕)
上映:11.5.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *