影評 —《愛無懼色》A United Kingdom 愛情襯托政治 種族歧視大平反

M佬:今日公司話打算調我去非洲,做開荒牛。
A姐:吓,咁突然?
M佬:你願唔願意放低香港嘅一切,跟我去非洲呀?

如果真係發生上面嘅事,唔知A姐會點答呢? 電影《愛無懼色》A United Kingdom 中嘅塞雷茨 Seretse Khama(大衛奧耶路加 飾)同露絲 Ruth Williams(露莎蒙碧姬 飾)面對嘅係更為複雜人生決擇,示範咗咩叫真愛。

種族歧視

電影以真人真事改編,講述非洲貝專納Botswana黑人王子塞雷茨喺倫敦讀法律,有一日喺舞會上邂逅白人露絲,二人一見鍾情,更不理世俗目光,決定結婚。電影極力反映四十年代嚴重嘅種族歧視。當露絲跟家人講呢件婚事,家人將佢趕離屋企,更認為白人嫁畀黑人係自降身價,對自己同家族嘅侮辱。另外,露絲到達貝專納發現,就算喺黑人自己嘅國家,因為英國嘅統治,出現White Only嘅電影院同餐廳,睇到都覺得心痛。

愛情襯托政治

回顧電影愛情同政治部分,唔難發現愛情嘅描寫好少,只係輕輕帶過,反而政治間嘅角力就清楚描寫。電影無咩交代塞雷茨同露絲因咩事相愛到咁深,只係寫佢哋跳咗幾隻舞,出咗幾次街咁。試諗下當塞雷茨同露絲求婚嗰陣,露絲諗都唔洗諗就應承咗,一定要係愛到好深先可以義無反顧咁放棄英國嘅一切,跟塞雷茨去世界其中一個貧窮國生活。導演刻意淡化愛情部分,明顯有主次之分,愛情只係一張花紙,政治部分先係重點。

A United Kingdom VS The United Kingdom

電影嘅另一主線就係講述非洲貝專納嘅獨立史,塞雷茨同露芙結婚激發起種族問題同政治間嘅角力,二人無放棄,最後令貝專納獨立。特別鍾意電影嘅英文名A United Kingdom,一方面係講貝專納獨立,另一方面似係玩相關,暗諷大英帝國The United Kingdom。電影描寫英國政府嘅奸險,為咗維持喺非洲嘅利益,多次阻撓塞雷茨返國執政,更將佢流放。

愛無懼色 A United Kingdom
導演:阿瑪·艾桑特 (Amma Asante)
演員:大衛奧耶路和 (David Oyelowo)、露莎蒙碧姬 (Rosamund Pike)
片長:1小時50分
級別:IIA 級
語言:英語 (中文字幕)
上映:06.04.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *