原來污泥可以咁樣玩 屯門源 · 區 T · Park

A姐成日都話想去半島酒店嘅水療中心歎吓,除咗舒服,聽講每一間房都望到維多利亞港嘅美景!但我邊到有咁多錢帶佢去啲咁高消費嘅地方呢,所以我決定帶佢去屯門源 · 區T · Park嘅水療池,雖然維港景就無喇,但勝在有個后海灣景囉!

想以個人名義預約參觀嘅朋友就要留意啦!源 · 區T · Park只接受3至30日前預約,每次最多可為7人預約(包括申請者本人,BB亦作一人計算)。預約以先到先得為原則,所以如果想星期六、日、公眾假期或特別日子出發,就要喺30日前上網預約參觀喇!(提提你:網站每天早上7時開始接受下個月之預約)

先選擇人數

預約導賞團及水療池(源·泉)時間
預約接駁巴士時間
輸入個人資料

當所有資料輸入後,你就會收到email同SMS嘅確認通知,咁就要好慢長咁等一個月喇!

終於到達出發前一日喇,有咩要準備先!

  • 如果已經預約導賞團記住喺開始前15分鐘到達,逾時不候㗎!
  • 如果已經預約水療池(源·泉)嘅朋友,記住要帶毛巾、沖涼液同洗頭水喇!放心,內有風筒!
  • 源 · 區T · Park除咗擁有2,800平方米嘅教育中心,仲有9,800平方米嘅戶外花園,預計參觀時間大概為3小時或以上。如有需要,可自備飲用水同少量乾糧!

終於出發喇!我哋去到屯門港鐵站,由C2出口落去巴士站,好容易就搵到前往源 · 區T · Park嘅接駁巴士,記住要喺出發時間前最少5分鐘到達,站頭姨姨會畀個記認貼紙你上車㗎。

半小時嘅車程經過龍鼓灘,見到大大個噴水池,就知我哋終於嚟到喇!到達之後,先去接待處以報名時輸入嘅電話號碼核實登記。如果你有背囊、手袋又唔想拎,仲可以放喺接待處後面嘅免費儲物櫃!園區設有免費wifi,但同你電話嘅network一樣,都係收得好差㗎!

放好晒嘢,我哋就開始今日嘅行程,跟住導賞團嘅職員,第一站就去到源 · 廳(T · Theatre)
喺呢個演講廳入面,可以透過播映嘅短片,了解源.區T · Park嘅小資料。

源.區T · Park耗資53億港元,為香港首個自給自足嘅污泥處理設施。結合多項先進科技及不同類型嘅設施於一身:每日可處理高達2,000公噸污泥嘅污泥焚化爐、發電系統、海水化淡廠,以及教育同自然生態設施。污泥焚化爐利用先進焚化系統,把污泥體積減少達90%,以大幅紓緩堆填區嘅壓力;而焚燒產生嘅熱能仲可以發電,電力足夠應付園內所有設施嘅日常運作,而剩餘電力仲會輸出去公眾電網,最多可供4,000個家庭使用;至於海水化淡廠每日可製造600立方米淡水,又會收集雨水作非飲用用途;而污水經處理後會用於灌溉、沖廁和清潔,全面達到污水零排放,而源 · 泉(T · Spa)就正正利用燃燒污泥產生嘅熱力將水加熱,成為水療中心。

離開源 · 廳,第二站就去到源 · 館(T · Hall)

喺呢個互動嘅展覽館,我同A姐透過唔同嘅展品、簡介同模型,可以認識污泥處理的過程。講解員叫我哋一定要試吓呢度經由海水化淡廠出產嘅水,味道同平時嘅蒸餾水同屋企嘅煲過嘅水都好大分別,我真係唔識形容呀,記住試呀!仲有呀,一定要聽清楚講解員嘅介紹同守則,今日就有部份小朋友唔遵守秩序,令講解員唔介紹其中一個展品喇!

第三站去到源 · 廊(T · Gallery)

沿住觀賞走廊,透過大型嘅玻璃窗,就可以睇到廠房嘅運作喇!真係望見都覺得複雜呀!當見到正在廠房嘅工作人員,我哋都不其然畀個like手勢佢哋,因為廠房除咗充斥住異味,佢地仲要24小時不停輪班工作!但放心,隔住呢個玻璃窗,係聞唔到怪味㗎!

1個半小時嘅導賞團,嚟到呢度就完滿結束,咁當然就要醫下肚先啦,去到園區唯一嘅餐廳-源 · 茶(T · Cafe)


呢個由社會企業管理嘅餐廳,提供簡單輕食,包括三文治、意粉、沙律等。自助揀完你想食嘅嘢,畀錢之後,就要自己拎去微波爐翻熱呀!以獨家經營嚟講,價錢唔貴,但份量就唔太多,所以有需要就自己帶少量乾糧嚟啦!餐後,記住要自己清洗餐具呀!

而呢到最吸引大家嘅就係由舊灣仔天星碼頭嘅防撞木製成嘅枱枱櫈櫈,完美地展現廢物利用!

食飽就去到源 · 點(T · Corner)


喺呢個休息區,有幾部電腦播放環保資訊、自然生態短片,仲有小遊戲玩㗎!

食飽飽又休息夠,就去到今日嘅重點行程源 · 泉(T · Spa)

入去之前,要先去到接待處核實資料及領取入場券。而作為全港唯一嘅公眾水療場館,設有唔同溫度嘅室內水療池,分別為18度、28度同38度。全部都係由污泥焚化過程中嘅餘熱保持恆溫。熱水池仲加入礦物鹽,以促進血液循環,一邊Enjoy水療,仲可以眺望后海灣一望無際嘅海景,今次A姐仲唔滿意咩?(記住喺源 · 泉T · Spa範圍內係唔影得相㗎,所以呢張係官方圖片)

圖片來源:源‧區官方網站

享受完水療,成個人鬆晒,繼續參觀,去到位於10樓嘅源 · 景(T · Sky)

喺呢個室內展望台,成個后海灣靚景一覽無遺,如果就啱日落時間就正喇!除此之外,呢度仲有由舊漫畫、舊車軚、舊牛仔褲製成嘅環保傢俬。我同A姐仲係留言板寫咗啲嘢,大家下次睇吓搵唔搵到喇!

由10樓落番嚟去到源 · 臺(T · Roof)

同源 · 景T · Sky一樣,都係睇后海灣靚景,不過呢個就係室外嘅天台花園,仲有好多花花草草添!

臨走之前,就去到源 · 林(T · Garden)


源 · 林T · Garden係一個超過9,800平方米嘅戶外園林花園,除咗有噴泉花園、悠閒花園、禪園、濕地花園之外,仲有最受歡迎嘅戶外足浴池!浸足浴池前記住要係旁邊嘅水喉洗洗腳先呀!

因為落雨,我哋就無去到源 · 湖(T · Habitat)
係一個雀鳥保護區,樹木林立。喺春秋二季,仲有機會見到唔同嘅季候鳥!

最後,記住喺回程前10分鐘,去到接待處核實及領取回程巴士券。如果想喺預訂時間提前離開,就要睇睇有無後補位喇!如果miss咗車嘅話,除咗call的士,都可能無第二個方法喇!

源 · 區(T · Park)
地址:屯門曾咀稔灣路 25 號
時間:星期一、星期三至日 上午 10 時至下午 7 時
門票:免費
網址:www.tpark.hk

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *