周末輕鬆離島遊 塔門東平洲雙島遊

又到weekend,又要諗吓同A姐去邊度玩喇!呢啲天氣最啱就係去郊遊,今次我哋去遠少少,嚟到塔門同東平洲,想一次過玩晒兩個島,其實有兩個方法,一係你就有架私人遊艇,一係就好似我哋咁,跟本地旅行團,咩都唔洗諗,簡單輕鬆一天遊。當然,如果想玩得再hea啲,分開兩日玩,自由行想點玩都得啦。

塔門

塔門係香港面積第十四大離島,比鴨脷洲大少少嘅塔門,更加有「小墾丁」之稱!由落船一刻已經見到海水透徹,真係好寫意。

塔門必到嘅景點有三個:疊石、大草原、天后廟!

疊石
兩個大大舊嘅石頭重疊,係遊客必到嘅打卡位。

大草原
喺香港想搵個平原好難,草原就更加難,但原來塔門就有一個,你又知唔知呢?呢個大草原除咗適合小朋友過嚟放風箏之外,更因為每日都有船往返,而吸引好多人嚟露營,同時大大嘅草原,都吸引好多牛牛喺度生活架!

天后廟
作為沿海城市嘅香港,真係有好多天后廟,塔門當然都有啦!聽講呢間天后廟已經有300年歷史喇,嚟到不妨拜拜,祈願安康。

而嚟到塔門,當然要試吓島上嘅名物:海膽炒飯同無冰凍奶茶啦。

而喺塔門,仲可以買到海味或者咸濕野(涼果)做手信。

往返交通:逢星期一至日及公眾假期均有航班往返馬料水至塔門及黃石碼頭至塔門,詳情:www.td.gov.hk

東平洲

東平洲面積為香港第十九大離島,除咗係香港最東北嘅領土,更加係香港聯合國教科文組織世界地質公園,記住喺地質公園,千祈唔好帶走任何珊瑚、貝殼以及礫石呀,仲要記住帶走所有垃圾呀!

東平洲雖然比塔門細,但可以行到嘅地方比較多,但如果你未嚟過,又想環島咁玩,就一定要自由行玩足一日喇。而我哋之前都嚟過東平洲,所以今次就簡單啲,睇吓呢度嘅沈積岩同更樓石。

更樓石
更樓石係兩座高7米嘅沉積岩石柱,豎立喺海蝕平台上面,因為似更樓而命名。

除咗更樓石,其實東平洲仲有唔少check point,好似係難過水、龍落水同斬頸洲。

往返交通:逢星期六、日及公眾假期均有航班往返馬料水至東平洲,詳情:www.td.gov.hk

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

Leave a Reply

Your email address will not be published. Required fields are marked *