最Charm係你啦!展城館 City Gallery 認識香港冷知識!

考下大家,知唔知道咩叫北港島綫?香港依家有咩基建?(哈!一陣話畀大家知!)你可能同我A姐一樣,雖然住喺香港,但就係好少留意呢啲嘢!有好多女人都覺得男人專心做嘢嗰陣最Charm,計我話M佬講解呢啲無咩人知冷知識就最型!好記得有一次同M佬行海旁,佢無啦啦問我知唔知點解機場起喺赤臘角,我就梗係唔知啦!佢一路講,我就覺得佢真心型,嗰腦點解會記得呢啲嘢。佢見到我聽得津津有味,就話要搵日帶我去一個博物館,叫做展城館 (City Gallery),話我實會鐘意!只要係M佬同我去,我去邊都會鐘意㗎啦!傻豬!

展城館 - 城市發展博物館 City Gallery - 10

展城館 (City Gallery),顧名思義係展示城市發展嘅博物館,位於大會堂隔離,共有四層。設計cyber,裏面多以電腦熒幕為主。進場嘅時候可以到reception拎QR code卡,據說可以方便啟動展館中嘅展品,但我哋拎咗唔覺得有咩用,建議大家唔洗拎。

地下無咩特別,唯一嘅展品就係比較一下香港同其他城市嘅分別。之後搭扶手電梯直上三樓,沿途懷舊嘅霓虹燈設計絕對係展城館最靚嘅設計之一。

展城館 - 城市發展博物館 City Gallery - 01

展城館三樓有一個電影廳,簡述香港由小漁村至今嘅城市發展,睇完好似上完雞精班咁(短片有提及北港島綫㗎)!電影廳外面仲展出唔同年代嘅香港地圖,話畀你聽香港填咗幾多海!

展城館 - 城市發展博物館 City Gallery - 02

展城館 - 城市發展博物館 City Gallery - 03

展城館 - 城市發展博物館 City Gallery - 04

大家更可以上去四樓嘅資源中心,我就覺得無乜嘢好睇。不過如果鐘意睇書嘅朋友,不妨可以去睇下。

二樓講及香港策略性嘅地下發展,基建設施同交通運輸。大家仲可以去玩下嗰百萬富翁問答遊戲,呵呵!點知畀我叻過M佬,比佢啱多一題。

展城館 - 城市發展博物館 City Gallery - 05

展城館 - 城市發展博物館 City Gallery - 07

展城館 - 城市發展博物館 City Gallery - 06

一樓最特別嘅係文物保護區,可以去設有渡海小輪座位嘅小影院睇短片。小朋友就可以去「下一個世紀的香港」展區砌下積木。

展城館 - 城市發展博物館 City Gallery - 08

展城館 - 城市發展博物館 City Gallery - 09

好啦!講咗咁耐,係時候開估啦!

北港島綫係一條計劃嘅東涌綫延綫,途經添馬艦及香港會議展覽中心,連接現有港島綫嘅炮台山站至柴灣站,以貫通中環新填海區、灣仔北、北角同鰂魚涌。但最後因為北港島綫將現有嘅港島綫分為兩半,干擾港島綫嘅運作,影響使用者嘅出行習慣,而胎死腹中。

其實香港依家都有好多基建,主要包括:沙中綫,港珠澳大橋,西九文化區, 啟德發展計劃(包括馬頭圍、九龍城、新蒲崗、九龍灣及觀塘嘅重建計劃),新界東北新發展區(即古洞北、粉嶺北及坪輋)等。

各位男士,如果想你女友面前威下,不妨背咗上面兩個答案,帶你嘅Honey去展城館威威!

展城館
地址:香港中環愛丁堡廣場3號 (近大會堂低座)
電話:+852 3102 1242
開放時間:每日10:00 – 18:00,逢星期二(公眾假期除外)及農曆新年初一及初二休館
費用:免費
網址:www.citygallery.gov.hk

(記得Like同Share畀朋友)


想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMDiary
Pinterest:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *